Միխալկովը պատմել է Պուտինի զանգի մասին՝ Ալիևի հետ ճաշի ընթացքում

Ռուսաստանյան հայտնի ռեժիսոր և դերասան Նիկիտա Միխալկովը «Բեսոգոն» հաղորդման ընթացքում պատմել է Իլհամ Ալիևի հետ ունեցած հանդիպումից, որի ժամանակ իրեն զանգահարել է ՌԴ նախագահ Վլադիմիր Պուտինը։ Միխալկովի խոսքով՝ տարիներ առաջ նա հյուր էր եղել Ադրբեջանում և ճաշի հրավիրված էր նախագահ Ալիևի կողմից։ Հենց ճաշի ընթացքում Պուտինը զանգահարել է նրան։

Ռեժիսորը նշել է, որ նախօրեին խնդրել էր մի հարցով զրուցել նախագահի հետ։ Պուտինի զանգն, ըստ Միխալկովի, մեծ ոգևորություն էր առաջացրել Ալիևի մոտ։ «Ես բառերով չեմ կարող փոխանցել այն հիացմունքն ու ուրախությունը, որով Ադրբեջանի նախագահը խոսեց Պուտինի հետ։ Այնքան քաղցր խոսքեր Պուտինը հազվադեպ է լսում հեռախոսով», — ասել է Միխալկովը։

Նա նաև հիշեցրել է, որ Հեյդար Ալիևի՝ Ադրբեջանի նախկին նախագահի օրոք հազարավոր ադրբեջանցիներ անվճար բարձրագույն կրթություն են ստացել Ռուսաստանում։ Միխալկովը քննադատել է պատմության մոռացությունը՝ մատնանշելով, որ Ադրբեջանում որոշ անձինք այսօր ցուցադրաբար ընդունում են նվերներ՝ ուկրաինական բանակի նացիստական նշաններով։ Նա ընդգծել է, որ Հեյդար Ալիևը եղել է ԿԳԲ-ի գեներալ՝ մի կառույցում, որն ակտիվորեն պայքարել է նացիստների հետ համագործակցած բանդերականների դեմ։