Ռուսական հատուկ ծառայությունները զգուշացրել են «Կրոկուս Սիթի Հոլ»-ի գործով դատավորին հնարավոր սադրանքների մասին

Ռուսաստանի հատուկ ծառայությունները տեղեկացրել են, որ «Կրոկուս Սիթի Հոլ»-ի ահաբեկչության գործով դատավարության ընթացքում կարող են սադրանքներ տեղի ունենալ՝ կազմակերպված մեղադրյալների համախոհների կողմից։ Այդ մասին հայտարարել է գործով նախագահող դատավոր Տիմուր Ժիդկովը՝ պարզաբանելով, թե ինչու է որոշում կայացվել նիստերը փակ ռեժիմով անցկացնել։

Ժիդկովը նշել է, որ հուլիսի 31-ին ստացվել է հատուկ տեղեկատվություն նման վտանգի մասին։ Դատավարությանը մասնակցող բոլոր 19 մեղադրյալները չեն առարկել նիստերի փակ անցկացման դեմ։ Տուժածների շահերը ներկայացնող փաստաբան Լյուդմիլա Այվարը նույնպես աջակցել է որոշմանը, սակայն խնդրել է, որ այլ որոշումները հրապարակվեն բաց ռեժիմով՝ ապահովելու դատավարության թափանցիկությունը։

Նշենք, որ «Կրոկուս Սիթի Հոլ»-ում տեղի ունեցած ահաբեկչությունը համարվում է ժամանակակից Ռուսաստանի ամենամեծ տեռորիստական գործողություններից։ 2024թ. մարտի 22-ին, նախքան «Պիկնիկ» խմբի համերգի մեկնարկը, ահաբեկիչները ներխուժել էին դահլիճ և կրակ բացել։ Զոհվել էր 149 մարդ։