Չորրորդ Ինքնիշխանություն. «Ստուգումները շարունակվում են»

 «Երեկ տեղեկացրել էինք, որ ՉԻ տեղեկություններով ՀՀ Պետական եկամուտների կոմիտեի աշխատակիցները, ինչպես նաև այդ գերատեսչության հատուկ ծառայություններն ու Սերժ Սարգսյանի վերահսկողական ծառայության աշխատակիցները լայնամասշտաբ ստուգումներ են սկսել ՀՀ խոշորագույն օլիգարխ Ռոբերտ Քոչարյանին վերագրվող արդյունաբերական ընկերություններում: Խոստացել էինք իմանալ, թե ի՞նչն է պատճառը, և ինչ հատուկ տեղեկությունների հիման վրա է սկսվել օպերացիան:

Եվ այսպես՝ երեկ տեղեկացանք, որ այդ ստուգումները սկսվել են Ռոբերտ Քոչարյանին վերագրվող Քաջարանի պղնձամոլիբդենային ընկերությունում, որի սեփականատերերից է Մաքսիմ Հակոբյանը: Մեր աղբյուրների փոխանցմամբ՝ սկզբում հերթական ստուգումների նպատակով, ընկերություն են այցելել ՊԵԿ աշխատակիցներ, այնուհետև Սերժ Սարգսյանի վերահսկողական ծառայության աշխատակիցներն են մտել ստուգումների: Վերջիններս այցելել են շատ կոնկրետ նպատակով՝ ստուգելու ընկերության՝ պետության կողմից տրված վարկերի ծախսման արդյունավետությունը: 2009 թվականին ՀՀ վարչապետ Տիգրան Սարգսյանը ճգնաժամի հաղթահարման նպատակով ՌԴ-ից խոշոր վարկ «կպցրեց»՝ մոտ 500 միլիոն ԱՄՆ դոլար, որից 10 միլիոնը հատկացվեց հանքարդյունաբերությանը: Այն ժամանակ այդպես էլ պաշտոնապես չհայտարարվեց, թե ում է տրվել այդ օժանդակությունը, փոխարենը՝ ողջ մամուլը հեղեղված էր տարբեր տնտեսագետների հրապարակային հայտարարություններով այն մասին, որ այդ գումարը տրվել է Քաջարանի պղնձամոլիբդենային ընկերությանը, և տրվել է այն պարզ պատճառով, որ ընկերությունը վերագրվում է Ռոբերտ Քոչարյանին: Թե ինչու է Սերժ Սարգսյանը հենց հիմա հիշել դրա մասին՝ կներկայացնենք հաջորդիվ»՝ «Չորրորդ Ինքնիշխանության» այսօրվա հրապարակումից: