Apple ստեղծում է սեփական ChatGPT-ն՝ ինտեգրելով արհեստական բանականությունը իր ծառայություններում

Apple ընկերությունը սկսել է աշխատել սեփական արհեստական բանականության ծառայության վրա, որը կլինի տեղեկատվության որոնման ինտելեկտուալ համակարգ։ Ինչպես հաղորդում է Bloomberg գործակալությունը, նախագիծը հիշեցնում է ChatGPT-ը՝ սակայն նախատեսված է բացառապես Apple-ի էկոհամակարգի համար։

Ընկերությունը ձևավորել է հատուկ թիմ՝ «Պատասխաններ, Գիտելիք և Տեղեկատվություն» անվամբ, որը զբաղվում է նոր համակարգի մշակմամբ։ Այն կկարողանա պատասխանել օգտատիրոջ հարցերին՝ տվյալներ ստանալով ինչպես ինտերնետից, այնպես էլ սարքի հիշողությունից, և կգործի երկխոսության ձևաչափով՝ նման chatbot-ին։ Նախագծի ղեկավարը դարձել է Apple-ի բարձրակարգ մենեջեր Ռոբի Ուոքերը, իսկ թիմում ներգրավվել են նաև Siri-ի նախկին մշակողներ։

Ըստ աղբյուրի՝ նոր համակարգը կմտնի Apple-ի գործող ծառայությունների մեջ՝ մասնավորապես Siri, Spotlight և Safari։ Հիշեցնենք, որ ավելի վաղ Apple-ի փոխնախագահ Քրեյգ Ֆեդերիգին հայտնել էր, որ ընկերությունը չի պատրաստվում ստեղծել առանձին chatbot, սակայն այժմ պատկերը փոխվում է՝ հաշվի առնելով AI-ի աճող դերը։