ՀԱՄԱՍ-ը հրաժարվել է զենքը վայր դնել մինչև Պաղեստինյան պետության ստեղծումը

ՀԱՄԱՍ խմբավորումը հայտարարել է, որ հրաժարվում է զինաթափվելուց, քանի դեռ չի ստեղծվել Պաղեստին պետությունը՝ Երուսաղեմ մայրաքաղաքով։

«Զինված դիմադրությունը  չի դադարի այնքան ժամանակ, քանի դեռ մեր ազգային իրավունքները լիովին չեն վերականգնվել, և առաջին հերթին չի ստեղծվել անկախ ու լիովին ինքնիշխան Պաղեստինյան պետություն՝ Երուսաղեմ մայրաքաղաքով»,- ՀԱՄԱՍ-ի խոսքը մեջբերում է Al Arabiya-ն։

Խմբավորումը նշել է, որ այդ մասին հայտարարում են ի պատասխան մի շարք ԶԼՄ-ների հաղորդագրությունների, որոնք մեջբերում են ԱՄՆ նախագահի հատուկ բանագնաց Սթիվ Ուիթքոֆի խոսքը ՀԱՄԱՍ-ի զինաթափման պատրաստակամության մասին:

ՀԱՄԱՍ-ը նաև քննադատել է Ուիթքոֆի այցը Գազայի հատված՝ բնակչությանը մարդասիրական օգնություն բաշխող կենտրոն՝ այն անվանելով «նախապես պատրաստված թատերական ներկայացում, որը նախատեսված է հասարակական կարծիքը մոլորեցնելու համար»։ ՀԱՄԱՍ-ը կոչ է արել Միացյալ Նահանգներին նպաստել Գազայում հրադադարին, իսրայելական զորքերի դուրսբերմանը և անկլավի շրջափակման վերացմանը։

Ավելի վաղ Ուիթքոֆը հայտարարել էր, որ այժմ գլխավոր քաղաքական խնդիրն է Գազայի հատվածում մարտական գործողությունների վերջնական դադարեցումը և իրավիճակի կարգավորման վերաբերյալ լիարժեք համաձայնությունը։

Միաժամանակ նա ասել է, որ ինքը ոչինչ չունի հաղորդելու ՀԱՄԱՍ-ի հետ պատանդների վերաբերյալ բանակցություններում հաջողությունների մասին։ «Բանակցությունները հուսահատեցնող էին, և հիմա մենք մտածում ենք. կամ պետք է անենք ամեն ինչ, կամ ոչինչ»,- ասել է ԱՄՆ նախագահի հատուկ ներկայացուցիչը։