Ռուսաստանը հրաժարվել է միջին և փոքր հեռահարության հրթիռների վերաբերյալ պարտավորություններից

Ռուսաստանը հրաժարվել է միջին և փոքր հեռահարության հրթիռների վերաբերյալ պարտավորություններից, հայտարարել Է ՌԴ ԱԳՆ-ն:

Գերատեսչության վարկածով՝ Արևմուտքի գործողությունները հանգեցնում են հարակից շրջաններում «ապակայունացնող հրթիռային պոտենցիալների ձևավորմանը և ավելացմանը, որոնք ուղղակի սպառնալիք են ստեղծում Ռուսաստանի անվտանգության համար»:

ԱԳՆ-ում ընդգծել են՝ իրադարձությունների նման զարգացումը կարող է վնասակար հետևանքների հանգեցնել տարածաշրջանային և գլոբալ կայունության համար, ներառյալ միջուկային տերությունների միջև «լարվածության վտանգավոր խթանումը»: Որպես ծագող սպառնալիքներին պատասխան՝ Ռուսաստանից պահանջվում են «փոխհատուցող ռազմատեխնիկական միջոցներ», որոնք թույլ կտան երաշխավորել ռազմավարական հավասարակշռության պահպանումը։