Չեռնիգովով կարելի է հարվածել Կիևին առանց այն գրոհելու. ՌԴ

Ռուս ռազմական վերլուծաբան Վլադ Շլեպչենկոն հայտարարել է, որ Ուկրաինայի Չեռնիգովի մարզը կարող է դառնալ նոր հարձակման ուղղություն, եթե Ռուսաստանը կուտակի անհրաժեշտ ուժեր։ Նրա խոսքով՝ Չեռնիգովով անցնում է ամենակարճ ճանապարհներից մեկը դեպի Կիև, և դրա ուղղությամբ առաջխաղացումը կարող է լուրջ ճնշում գործադրել ուկրաինական զինուժի և իշխանության վրա՝ առանց մայրաքաղաքն ուղղակի գրոհելու։

Շլեպչենկոն ընդգծել է, որ Չեռնիգովը դիտվում է որպես «հեռավոր անկյուն», սակայն այն ունի ռազմավարական կարևորություն՝ որպես Կիևի մատակարարման և կառավարման կենտրոն։ Հարձակման սպառնալիքը, ըստ նրա, արդեն բավարար է կաթվածահար անելու երկրի ներքին լոգիստիկան։

Նա չի բացառել, որ այս ուղղությամբ հնարավոր զարգացումները կարող են լինել կամ ինքնուրույն գործողություն, կամ նախապատրաստական փուլ՝ այլ ռազմաճակատում հարված հասցնելու համար։ Իսկ Դոնբասում, ըստ այլ վերլուծաբանների, ՌԴ վերահսկողության հաստատումը Չասով Յարում կարող է կազմաքանդել Ուկրաինայի պաշտպանությունն ամբողջ ճակատում։