Նավթի գինը կտրուկ ընկել է՝ Brent-ը՝ 68 դոլարից ցածր

Brent տեսակի նավթը կտրուկ էժանացել է՝ ընկնելով 68 դոլարից ներքև։ Օրվա ընթացքում սակարկությունների նվազագույն գինը կազմել է 67.93 դոլար մեկ բարելի դիմաց։ Տեխասյան WTI տեսակի նավթի գինը նույնպես նվազել է՝ հասնելով 65.49 դոլարի՝ մոտ մեկ դոլար անկումով։

Գների անկումը սկսվել է օգոստոսի 4-ին՝ ՕՊԵԿ+ դաշինքի որոշումից հետո, որով վերացվել են նախկինում կիրառվող կամավոր արտադրական սահմանափակումները։ Ըստ վերլուծաբանների՝ այս քայլը կապված է վառելիքի բարձր պահանջարկի և ցածր պաշարների հետ։

Բացի այդ, Bloomberg-ը նշում է, որ գների վրա ազդել է նաև Հնդկաստանի վարչապետ Նարենդրա Մոդիի կոշտ դիրքորոշումը։ Նա հրաժարվել է դադարեցնել ռուսական նավթի գնումը՝ չնայած ԱՄՆ նախագահ Դոնալդ Թրամփի սպառնալիքներին՝ սանկցիաներ սահմանել ռուսական վառելիքի գնորդների դեմ։ Հնդկաստանում նավթ գնելու որոշումները թողնվել են ընկերությունների հայեցողությանը։