Տուսկը հայտարարել Է Վրաստանի և Հայաստանի քաղաքացիների մուտքը սահմանափակելու հնարավորության մասին

Լեհաստանի վարչապետ Դոնալդ Տուսկը հայտարարել է՝ Վարշավան դիտարկում է մի շարք երկրների, այդ թվում՝ Վրաստանի և Հայաստանի քաղաքացիների համար առանց վիզայի մուտքի սահմանափակման հնարավորությունը: Այս մասին հայտնում է Грузия Online-ը։

Նրա խոսքով՝ ներկայումս քննարկվում է Շենգենյան գոտում ազատ տեղաշարժի կանոնների գործողության սահմանափակումը մի քանի երկրների քաղաքացիների համար, այդ թվում՝ Վրաստանի, Հայաստանի, Վենեսուելայի և Կոլումբիայի: Տուսկը պարզաբանել է, որ նախկին Խորհրդային Միության երկրների քաղաքացիները «հասկանալի պատճառներով» ավելի խոցելի են ռուսական հատուկ ծառայությունների կողմից հավաքագրումների նկատմամբ:

Նա նաև մատնանշել է «հանցավորության հետ կապված խնդիրները»՝ կապված Վրաստանի քաղաքացիների հետ՝ ընդգծելով՝ «խոսքը ոչ մի դեպքում չի վերաբերում ազգային դիմագծերին, այլ կազմակերպված հանցավոր խմբավորումների գործունեությանը»: Նրա խոսքով՝ Լեհաստանը երկրից վտարելու է բոլոր նրանց, ովքեր խախտում են օրենքը։