Հայաստանում 12-ամսյա գնաճն արագացել է, հունիսին կազմելով՝ 3,9%․ ԿԲ

Վերաֆինանսավորման տոկոսադրույքը հերթական անգամ մնաց անփոփոխ։ Այս մասին այսօր՝ օգոստոսի 5-ին, մամուլի ասուլիսի ընթացքում հայտարարեց ՀՀ կենտրոնական բանկի նախագահի տեղակալ Արմեն Նուրբեկյանը։

«2025 թվականի օգոստոսի 5-ի նիստում ԿԲ խորհուրդը որոշեց անփոփոխ թողնել վերաֆինանսավորման տոկոսադրույքը, սահմանելով՝ 6,75%: 2025 թվականի երկրորդ եռամսյակի ընթացքում 12-ամսյա գնաճն արագացել է, հունիսին կազմելով՝ 3,9%: Միաժամանակ 12-ամսյա բնականոն գնաճը ևս ավելացել է, կամզելով՝ 3,1 %:

2025 թվականի երկրորդ եռամսյակում համաշխարհային տնտեսությունում և Հայաստանի հիմնական գործընկեր երկրներում պահանջարկի հետագա դանդաղման, իսկ ԱՄՆ-ում զուգահեռաբար նաև գնաճի արագացման ռիսկերն ավելացել են։

ԱՄՆ-ի առևտրային քաղաքականության և դրա մակրոտնտեսական ազդեցությունների  շուրջ բարձր անորոշությունը պահպանվում է։ Բարձր է մնում նաև միջնաժամկետում ԱՄՆ-ի հարկաբյուջետային քաղաքականության կոմղից ամբողջական պահանջարկի խթանման չափի, դրանից ածանցվող պարտքի մեծացման և երկարաժամկետ տոկոսադրույքների աճի չափի շուրջ անորոշությունները։

Միևնույն ժամանակ աշխարհաքաղաքական անորոշությունը և միջազգային առևտրային հարաբերություններում լարվածության աճը շարունակում են մատակարարման շղթաների հնարավոր խաթարման և համաշխարհային տնտեսությունում գնաճային ճնշումների ձևավորման ռիսկերի աղբյուր հանդիսանալ։ Ավելին, տարեսկզբից հիմնականում առաջարկի գործոններով պայմանավորված, պարենի միջազգային գների աճը և նման միտումների պահպանումը կարող են համաշխարհային գնաճի արագազման ռիսկերի հիմնական աղբյուրներից լինել։

Այս համատեքստում՝ հաշվի առնելով մի կողմից թույլ պահանջարկի միջավայրի ձևավորման, և մյուս կողմից՝ բարձր գնաճային միջավայրի պահպանման ռիսկերը, հավանական է, որ առաջատար երկրների կենտրոնական բանկերն առաջիկայում հիմնականում կպահպանեն կամ աստիճանաբար կթուլացնեն դրամավարկային խիստ պայմանները»,- ասաց նա։