ՌԴ ԶՈւ-ն հարվածել է Ուկրաինայի գազատրանսպորտային օբյեկտներին և դրոնների պահեստներին

Ռուսաստանի պաշտպանության նախարարությունը հայտնել է, որ ավիացիան, հարվածային դրոնները և հրետանին հարվածներ են հասցրել Ուկրաինայի գազատրանսպորտային համակարգի օբյեկտներին, որոնք ապահովում են զինարդյունաբերական համալիրի աշխատանքը։ Բացի այդ, ոչնչացվել են հեռահար անօդաչու սարքերի պահեստներ և օտարերկրյա վարձկանների ժամանակավոր տեղակայման կետեր։

Ընդհանուր հաշվով հարվածները հասցվել են 142 տարածքում։ Հակաօդային պաշտպանությունը խոցել է 244 ինքնաթիռային տիպի դրոն և 7 կառավարվող ավիառումբ։

ՊՆ տվյալներով՝ հատուկ ռազմական գործողության սկզբից ոչնչացվել է ավելի քան 74 հազար դրոն, 24 հազար տանկ և զրահամեքենա, ինչպես նաև հազարավոր հրետանային համակարգեր ու այլ ռազմական տեխնիկա։