Mars կօգտագործի գենային ինժեներիա՝ շոկոլադի արտադրությունն ապահովելու համար

Շոկոլադ արտադրող համաշխարհային հսկա Mars ընկերությունը որոշել է կիրառել գենային ինժեներիա՝ ստեղծելու ավելի կայուն և դիմացկուն կակաոյի ծառեր։ Bloomberg-ը հայտնում է, որ ընկերությունն արդեն պայմանագիր է կնքել Pairwise ընկերության հետ, որը մասնագիտացած է գեների խմբագրման ոլորտում։

Այս քայլը պայմանավորված է Արևմտյան Աֆրիկայում՝ մասնավորապես Կոտ դ’Իվուարում և Գանայում կակաոյի բերքատվության կտրուկ անկմամբ, որը առաջացել է կլիմայական պայմանների և հիվանդությունների հետևանքով։ Արդյունքում, կակաոյի գինը հասել է պատմական առավելագույնին։

Mars-ն ակնկալում է, որ գենային տեխնոլոգիաները կբարելավեն մշակաբույսերի որակը և կապահովեն մատակարարման կայունությունը։ ԵՄ-ն և Շվեյցարիան նույնպես քննարկում են իրենց օրենքների փոփոխությունը՝ գենախմբագրված մշակաբույսերի թույլտվության ուղղությամբ։ Փորձագետների գնահատմամբ, ԳՄՕ արտադրանքների վնասակարության վերաբերյալ գիտական համոզիչ ապացույցներ մինչ այժմ չկան։