Իսրայելի բանակի հրամանատարը դեմ է Գազայում ռազմական գործողությունների ընդլայնմանը՝ մեծացնելով ճնշումը Նեթանյահուի վրա

Իսրայելի զինված ուժերի գլխավոր շտաբի պետ Էյալ Զամիրը նախազգուշացրել է վարչապետ Բենիամին Նեթանյահուին, որ Գազայի լիակատար գրավումը կարող է զինվորներին փակուղի մղել և վտանգել այնտեղ պահվող պատանդների կյանքը։ Այս մասին հայտնել են իսրայելական բարձրաստիճան պաշտոնյաներ։

Համաշխարհային ճնշման ներքո Նեթանյահուն փորձում է ընդլայնել ռազմական գործողությունները, սակայն Զամիրը դեմ է՝ զգուշացնելով, որ Իսրայելը կարող է խրվել Գազայում, որտեղից դուրս է եկել դեռ երկու տասնամյակ առաջ։ Իսրայելի պաշտպանության նախարարը հայտնել է, որ Զամիրը պարտավոր է արտահայտել իր դիրքորոշումը, սակայն բանակը կկատարի կառավարության որոշումները։

Նեթանյահուն ցանկանում է ուժեղացնել ռազմական ճնշումը Համասի վրա, սակայն ընդդիմությունն ու հասարակության մի մասը պահանջում են դադարեցնել պատերազմը։ Վերջին հարցումները ցույց են տալիս՝ բնակչությունն աջակցում է դիվանագիտական համաձայնության։

Համաձայն տեղական տվյալների՝ Գազայում զոհվել է ավելի քան 61,000 մարդ, հիմնականում խաղաղ բնակիչներ։ Շուրջ 200 պաղեստինցի մահացել է սովից, իսկ պատանդների վիճակը շարունակում է անհանգստացնել միջազգային հանրությանը։ Նեթանյահուն նախատեսում է ռազմական ծրագրերի քննարկում անցկացնել նախարարների հետ հինգշաբթի, հայտնում է Reuters-ը։