ԱՄՆ-ը սպառնում է բարձրացնել մաքսատուրքեր բոլոր պետությունների հանդեպ, որոնք շարունակում են գնել ռուսական նավթ

ԱՄՆ իշխանությունները նախազգուշացրել են, որ կարող են ընդլայնել բարձր մաքսատուրքերի կիրառումը ոչ միայն Հնդկաստանի, այլև բոլոր այն երկրների հանդեպ, որոնք շարունակում են ներմուծել ռուսական նավթ՝ չնայած նախագահ Դոնալդ Թրամփի կոչերին։ Այս մասին հայտնում է Սպիտակ տունը։

Վաշինգտոնը մտադիր է այս տնտեսական ճնշման միջոցով կրճատել Ռուսաստանի նավթից ստացվող եկամուտները և ստիպել Մոսկվային համաձայնել խաղաղ պայմանագրի ստորագրմանը Ուկրաինայի հարցում։ Հնդկաստանի նկատմամբ արդեն սահմանվել է 25 տոկոս մաքսատուրք, իսկ նմանատիպ քայլեր հնարավոր են նաև այլ երկրների հանդեպ, որոնք ներմուծում են ռուսական էներգակիրներ՝ նույնիսկ անուղղակի ճանապարհով։

Բացի այդ, նշվում է, որ նման քայլերը կարող են զգալիորեն սրել իրավիճակը նավթային շուկայում։ Brent նավթի գինը արդեն աճել է մեկ տոկոսով՝ հասնելով 68,24 դոլարի։ Վերլուծաբաններն ընդգծում են՝ ռուսական նավթի ամբողջական փոխարինումը դժվար կլինի ոչ միայն Հնդկաստանի, այլև մյուս հիմնական գնորդների համար, գրում է Лента.ру-ն։