Ճապոնիան պահանջում է հստակեցում ԱՄՆ-ից՝ ավտոմաքսերի կրճատման շուրջ համաձայնագրի կապակցությամբ

Ճապոնիան կոչ է անում ԱՄՆ-ին արագորեն իրականացնել ավտոմեքենաների ներմուծման մաքսատուրքերի կրճատման շուրջ ձեռք բերված համաձայնությունը՝ միաժամանակ հստակեցում պահանջելով այլ ապրանքների մաքսատուրքերի հարցում։ Այս իրավիճակը ճնշում է գործադրում վարչապետ Շիգերու Իշիբայի արդեն իսկ փխրուն կառավարության վրա։

Ճապոնիայի գլխավոր առևտրային բանակցող Ռյոսեյ Ակազավան Վաշինգտոնում հանդիպել է ԱՄՆ առևտրի նախարար Հովարդ Լաթնիքի հետ՝ կոչ անելով անհապաղ գործի դնել պայմանավորված կրճատումը, որով ամերիկյան ավտոմաքսերը ճապոնական ապրանքների համար պետք է իջնեն 27.5%-ից մինչև 15%։ Սակայն մինչ այժմ ԱՄՆ-ն չի հրապարակել որևէ պաշտոնական ժամկետ այս փոփոխության կիրառման վերաբերյալ։

Միաժամանակ ճապոնական կողմը պահանջում է երաշխիքներ, որ նոր 15% մաքսատուրքերը չեն գումարվի արդեն գոյություն ունեցող դրույքաչափերին՝ այսպես կոչված "stacking"-ի սկզբունքով։ Սակայն ամերիկյան վարչակազմի հրապարակած փաստաթղթերում նման բացառություն նշված է միայն ԵՄ-ի համար՝ ոչ Ճապոնիայի, հայտնում է  Reuters-ը։

Ներքաղաքական քննադատության ալիքի ներքո վարչապետ Իշիբան պնդել է, որ հրաժարվել են գրավոր փաստաթղթից՝ ԱՄՆ-ում մաքսերի նվազեցումը չձգձգելու նպատակով։ Սակայն ընդդիմադիրները և իշխող կուսակցության ազդեցիկ գործիչներն ասում են՝ առանց հստակ գրավոր հաստատման, գործարքն անկայուն է՝ հատկապես Թրամփի անկանխատեսելի քաղաքականության պայմաններում։