Գործելու է «Թրամփի երթուղի»․ ինչ փաստաթղթեր են ստորագրելու Երևանը և Բաքուն․ Reuters

Վաղը Վաշինգտոնում կայանալիք ԱՄՆ-Հայաստան-Ադրբեջան եռակողմ բանակցությունների ընթացքում կողմերը խաղաղության շրջանակային փաստաթուղթ կստորագրեն, որն իր մեջ կներառի նաև Հարավային Կովկասով անցնող ռազմավարական հաղորդակցության ուղու զարգացման բացառիկ իրավունքը Միացյալ Նահանգներին հանձնելու դրույթը։ Այս մասին տեղեկացնում է Reuters գործակալությունը՝ իր պաշտոնական աղբյուրները վկայակոչելով։

Ըստ Reuters–ի՝ Հայաստանը նախատեսում է երկար ժամանակահատվածով  Միացյալ Նահանգներին տրամադրել բացառիկ հատուկ զարգացման իրավունքներ տարանցիկ միջանցքի նկատմամբ, որը կկոչվի «Միջազգային խաղաղության և բարգավաճման Թրամփի երթուղի», որը հայտնի է նաև TRIPP հապավումով, ասել են պաշտոնյաները։

 «Ճանապարհը շահագործվելու է Հայաստանի օրենքների համապատասխան, սակայն Միացյալ Նահանգները դրա կառուցման համար հատկացված հողը վարձով տրամադրելու է կոնսորցիումին՝ ենթակառույցների [ստեղծման] և կառավարման համար», - պնդում են Reuters-ի աղբյուրները։

Նշվում է, որ Հայաստանի և Ադրբեջանի ղեկավարները նաև կստորագրեն փաստաթղթեր՝ խնդրելով լուծարել Մինսկի խումբը։

Իր հերթին Պետդեպում հավատարմագրված լրագրող Ալեքս Ռաուֆօղլուն գրել է X-ում․ «Այլևս միջանցք չկա, Թրամփ-Փաշինյան-Ալիև գագաթնաժողովին ուշադրության կենտրոնում է լինելու «Թրամփի երթուղի միջազգային խաղաղության և բարգավաճման համար» կամ TRIPP անվամբ տարանցիկ և զարգացման նոր ծրագիրը»։

Նշենք, որ այս տեղեկությունները պաշտոնապես չեն հաստատվել կամ հերքվել։