Toyota-ն հայտարարում է $9.5 միլիարդի վնասի մասին

Ճապոնական ավտոհսկա Toyota-ն հայտնել է, որ ԱՄՆ-ում նախագահ Դոնալդ Թրամփի սահմանած ներմուծման բարձր մաքսատուրքերի հետևանքով կարող է կրել մինչև 9.5 միլիարդ դոլարի վնաս։ Այս մասին հայտնում է ՏԱՍՍ-ը՝ հղում անելով ընկերության վերջին եռամսյակային հաշվետվությանը։

Ապրիլ-հունիս ամիսներին Toyota-ի մաքուր շահույթը նվազել է 36.9%-ով։ Ընկերությունը նշում է, որ թուլացման հիմնական գործոններից են ԱՄՆ կառավարության սահմանած պաշտպանական մաքսերը։ Ըստ հաշվետվության՝ գնահատված վնասները աճել են յոթ անգամ՝ նախորդ կանխատեսումների համեմատ։

Ընկերությունն ակնկալում է, որ մինչև ֆինանսական տարվա ավարտը (2026-ի մարտ) իր իրական եկամուտները կնվազեն շուրջ 44.2%-ով։ Toyota-ն, ինչպես նաև մի շարք այլ ճապոնական արտադրողներ, մեծապես կախված են ԱՄՆ շուկայից․ նախորդ տարում այնտեղ է արտահանվել ամբողջ արտադրանքի մոտ 29%-ը։

Նման ֆոնին ճապոնական ավտոարտադրողների ֆինանսական վիճակը նկատելիորեն վատթարացել է․ Honda-ն հայտնել է շահույթի ավելի քան 50% անկման մասին, իսկ Mazda-ի կորուստները կազմել են 313 միլիոն դոլար։ Թրամփը շեշտել էր, որ մաքսային ճնշումը կնվազի միայն այն դեպքում, եթե օտարերկրյա ընկերությունները իրենց արտադրությունը տեղափոխեն ԱՄՆ։