ԱՄՆ-ը ցանկանում է դուրս մղել Ռուսաստանին Ասիական գազի և նավթի շուկայից

ԱՄՆ-ը մտադիր է փոխարինել Ռուսաստանին՝ դառնալով Ասիայի երկրների գլխավոր մատակարարը նավթի և բնական գազի ոլորտում։ Այս մասին հայտարարել է ԱՄՆ էներգետիկայի նախարար Քրիս Ռայթը՝ հաղորդում է «ՌԻԱ Նովոստի»-ն։

Ռայթը նշել է, որ Վաշինգտոնը արդեն բանակցություններ է վարում Ասիայի մի շարք երկրների հետ՝ վերանայելու էներգակիրների ներկրման առաջնահերթությունները։ Նա հավելել է, որ ԵՄ-ում Ռուսաստանի փոխարեն արդեն մատակարարում է ԱՄՆ-ը, և այժմ նման գործընթաց է մեկնարկել նաև Ասիայում։ «Հատկապես այժմ երկխոսություն է սկսվել Հնդկաստանի հետ, թեև դեռ վաղ փուլում է»,- ասել է նախարարը։

Սպիտակ տան դիրքորոշումը նաև սպառնալիք է պարունակում. ԱՄՆ-ն պատրաստ է բարձր մաքսատուրքեր կիրառել այն երկրների նկատմամբ, որոնք շարունակում են ռուսական նավթի ներմուծումը՝ ուղղակի կամ անուղղակի եղանակով։ Այս միջոցառումները հիմնականում ուղղված են Չինաստանի և Հնդկաստանի դեմ՝ երկու երկրների, որոնք շարունակում են ակտիվ համագործակցել Ռուսաստանի հետ։