Օգտագործելով Փաշինյանին՝ Թուրքիան Հայաստանով ուղիղ ճանապարհ է ճեղքելու դեպի Ադրբեջան, Կասպից և Միջին Ասիա․ Զատուլին

ՌԴ Պետդումայի պատգամավոր Կոնստանտին Զատուլինը խիստ քննադատել է Հայաստանի մասնակցությունը Վաշինգտոնում ընթացող բանակցություններին՝ այն անվանելով պատրաստվող գործարքի «ամենասարսափելի» կողմը: Այդ մասին նա գրել է Telegram-ի իր ալիքում։

«Ռուսաստանի երկու հավատարիմ ընկերներ Իլհամ Ալիևն ու Նիկոլ Փաշինյանը շտապել են Վաշինգտոն՝ ԱՄՆ նախագահի հսկողության ներքո գործարք կնքելու: Մինչև վերջ պարզ չէ՝ նրանք կստորագրեն այսպես կոչված խաղաղության պայմանագիրը, թե կսահմանափակվեն միջանկյալ հուշագրով։ Բայց մի բան պարզ է՝ Ամերիկան գալիս է տարածաշրջան, իսկ Ռուսաստանն ու Իրանը պետք է հաշտվեն դրա հետ։ Օգտագործելով Փաշինյանին՝ Թուրքիան Հայաստանով ուղիղ ճանապարհ է ճեղքելու դեպի Ադրբեջան, Կասպից և Միջին Ասիա։ 

Այս ամենում ամենասարսափելին Հայաստանի մասնակցությունն է։ Պետք չէ հիշեցնել, որ Զանգեզուրի միջանցքը վերաբերում է 2020 թվականին Լեռնային Ղարաբաղում պատերազմի արդյունքներով Հայաստան-Ադրբեջան-Ռուսաստան եռակողմ ձեռք բերված պայմանավորվածություններին։ Այն ժամանակ դա Հայաստանի և Լեռնային Ղարաբաղի միջև գոյություն ունեցող Լաչինի միջանցքը հիպոթետիկ Զանգեզուրի միջանցքով փոխանակելու փորձ էր։ Բայց հիմա Լեռնային Ղարաբաղում հայեր չկան, ինչպես չկա նաև Լաչինի միջանցքը։ Իսկ նրանց հետ վերացել է նաև Ռուսաստանի հետ որևէ բան համաձայնեցնելու անհրաժեշտությունը։ Այն, որ այսօր մեր աչքի առաջ դա հնարավոր է դառնում, ոչ միայն ինչ-որ սխալ հաշվարկների հետևանք էր, այլև տարածաշրջանում Ռուսաստանի թուլացման օբյեկտիվ փաստ՝ Ուկրաինայում պատերազմի և Արևմուտքի հետ հակամարտության պատճառով, - գրել է Զատուլինը։