Իրանը մտահոգված է Հարավային Կովկասում ցանկացած տեսակի արտաքին միջամտության բացասական հետևանքներով․ ԱԳՆ

Իրանը ուշադրությամբ հետևում է Հարավային Կովկասում ընթացող գործընթացներին և այդ իրադարձությունների շուրջ կապի մեջ է երկու հարևան երկրների՝ Ադրբեջանի և Հայաստանի հետ: Այս մասին ասվում է Իրանի ԱԳՆ հայտարարության մեջ, փոխանցում է Mehr News Agency-ն։

«Անկասկած, Կովկասում խաղաղությունն ու կայունությունը համապատասխանում են տարածաշրջանի բոլոր երկրների շահերին։ Իրանը, ողջունելով երկու երկրների կողմից խաղաղության համաձայնագրի տեքստի նախապատրաստման ավարտը, այս իրադարձությունը գնահատում է որպես կարևոր քայլ տարածաշրջանում կայուն խաղաղության հաստատման ճանապարհին: Միևնույն ժամանակ, մտահոգություն է հայտնվում ցանկացած տեսակի արտաքին միջամտության բացասական հետևանքների վերաբերյալ, ցանկացած ձևով և մեթոդներով, հատկապես ընդհանուր սահմանների մոտ, որը կարող է խաթարել տարածաշրջանի անվտանգությունն ու կայունությունը:

Իրանը, ընդգծելով իր ազգային իրավունքների և շահերի ապահովման համար բոլոր քաղաքական, իրավական և տնտեսական միջոցների ձեռնարկման անհրաժեշտությունը, գտնում է, որ տրանսպորտային ուղիների ստեղծումը և հաղորդակցության ցանցերի շրջափակման վերացումը կծառայեն տարածաշրջանի ժողովուրդների կայունությանը, անվտանգությանը և տնտեսական զարգացմանը միայն այն դեպքում, եթե դա տեղի ունենա փոխադարձ շահերի շրջանակներում, տարածաշրջանի երկրների ազգային ինքնիշխանության և տարածքային ամբողջականության պահպանմամբ և առանց արտաքին միջամտության: Իրանը պատրաստ է շարունակել փոխադարձ շահերի վրա հիմնված կառուցողական համագործակցությունը երկու երկրների հետ՝ պաշտպանելու տարածաշրջանի խաղաղությունը, կայունությունը և տնտեսական զարգացումը երկկողմ և տարածաշրջանային փոխգործակցության միջոցով, ներառյալ «3+3» մեխանիզմը», - նշված է հայտարարության մեջ: