Ռուսաստանը բացի բանակից, նավատորմից և օդատիեզերական ուժերից ընկերներ չունի․ Պետդումայի պատգամավոր

Ռուսաստանը կարող է «ջախջախել» ադրբեջանական սփյուռքը և էթնիկ հանցավոր խմբավորումների բիզնեսը, հայտարարել Է Պետդումայի պատգամավոր Միխայիլ Մատվեևը, փոխանցում է Газета-ն։ 

«Երկար տարիներ բարեկամ երկիր համարվող Ադրբեջանի գործողությունները կարելի է դիտարկել որպես ինչ-որ պատահականություն, չնախատեսված կոնկրետ իրադարձությունների արդյունք, որոնք հանգեցրել են գործընկերների միջև թյուրըմբռնման։ Բայց մեր ԱԳՆ-ի և արտաքին քաղաքականության խնդիրն այն է, որ չի կարելի ցանկալին անվերջ իրականության տեղ ներկայացնել և ապրել պատրանքների աշխարհում։ Ռուսաստանը բացի բանակից, նավատորմից և օդատիեզերական ուժերից ընկերներ չունի։ Վաղուց ժամանակն է անցնել պրագմատիկ հարաբերությունների հետխորհրդային տարածքի բոլոր երկրների հետ․ «Դու ինձ, ես քեզ» սկզբունքով և հասկանալ, որ համակարգային ռուսատյացությունը հետխորհրդային բոլոր վարչակարգերի գաղափարախոսությունների հիմքն է. դրանք նրանց անկախության հիմնասյուներն են։ Եթե դա հասկանանք, ապա հիասթափություն էլ չի լինի», - ասել է Մատվեևը։

«Ինչով կարող է Ռուսաստանը պատասխանել։ Պատասխանն ակնհայտ է՝ Սփյուռքի ջախջախմամբ և Ռուսաստանում էթնիկ հանցավոր խմբավորումներին ու նրանց բիզնեսին հարվածելով։ Բայց դրա համար պետք է նախ և առաջ գործ ունենալ իշխանության և ուժային կառույցների նրանց լոբբիստների հետ», - հայտնել է պատգամավորը։