Գյումրիում ազդարարվեց Երիտասարդության միջազգային օրվա միջոցառումների մեկնարկը

Գյումրիում ազդարարվեց Երիտասարդության միջազգային օրվա միջոցառումների մեկնարկը։ Ինչպես տեղեկացնում է «Արմենպրես»-ը, «Երիտասարդական նախաձեռնությունների կենտրոն» ՀԿ-ն, Գյումրիի համայնքապետարանի, ՍԱԼՏՕ Արևելյան Եվրոպա և Կովկաս ռեսուրսային կենտրոնի, ՄԱԿ-ի Բնակչության հիմնադրամի, ինչպես նաև Հայաստանում «Erasmus+ Երիտասարդություն» և «Եվրոպական համերաշխության կորպուս» ծրագրերի տեղեկատվական կենտրոնի հետ համատեղ հանդես է գալիս Գյումրիում մեծամասշտաբ միջոցառումների իրականացման նախաձեռնությամբ։

«Երիտասարդական նախաձեռնությունների կենտրոն» ՀԿ-ն 2015 թվականից սկսած Գյումրիում իրականացնում է տարաբնույթ հանրային միջոցառումներ՝ նվիրված Երիտասարդության միջազգային օրվան։ Այս տարի ևս նախատեսվում են բազմաբնույթ միջոցառումներ։ Այս մասին լրագրողների հետ ունեցած ասուլիսի ժամանակ նշեց ՀԿ խորհրդի նախագահ Արթուր Նաջարյանը։

«Սա մեզ համար շատ բացառիկ և կարևոր հարթակ է՝ խոսելու Հայաստանի, մասնավորապես՝ Գյումրու ստեղծարար երիտասարդական ուժի մասին։ Այս տարին առանձնահատուկ է նրանով, որ այս տարի ՄԱԿ-ի կողմից որպես երիտասարդության օրվա խորագիր ընտրվել է «Երիտասարդական նախաձեռնությունները հանուն կայուն զարգացման» թեման։ Սա մեզ համար շատ կարևոր է, քանի որ խոսքը գնում է համայնքներում երիտասարդության կյանքի որակի բարելավման ու բարեկեցության ապահովման մասին։ Մեզ համար սա միշտ հպարտանալու առիթ է, որ հենց Գյումրիում մեկնարկեցին երիտասարդության օրվան նվիրված միջոցառումները, որոնք լայն տարածում են գտնում հանրապետությունում։ Սա նաև հրաշալի հնարավորություն է, որ երիտասարդների ձայնը լինի լսելի, և նրանց դերը համայնքում՝ կարևորված»,-նշեց Արթուր Նաջարյանը։

ՀԿ խորհրդի նախագահը նաև տեղեկացրեց, որ միջոցառումների շրջանակում կանցկացվի «ՄԻՍՍԻԱ 17» քվեստը, որն իրականացվում է Եվրամիության «Եվրոպական համերաշխության կորպուս» (ԵՀԿ) ծրագրի շրջանակում։ Գյումրիում հինգ երկրներից հյուրընկալված 20 միջազգային կամավորներ թատերական հրապարակում կկազմակերպեն քվեստ-մրցույթ, որը նպատակ ունի բարձրացնել իրազեկվածությունը ՄԱԿ-ի կողմից սահմանված կայուն զարգացման նպատակների վերաբերյալ։ Քվեստի ընթացքում մասնակիցները, ճիշտ պատասխանելով հարցերին կամ հաղթահարելով փորձությունները, կհավաքեն խճանկարի (փազլի) կտորներ, և որպես վերջնարդյունք՝ թատերական հրապարակում կստեղծվի կայուն զարգացման 17 նպատակներով խոշոր խճանկար։

Erasmus+ Երիտասարդություն և Եվրոպական համերաշխության կորպուս ծրագրերի տեղեկատվական կենտրոնի հետ համագործակցությամբ՝ Գյումրիում հյուրընկալված ծրագրի շուրջ 30 շրջանավարտ կամավորներ կներկայացնեն եվրոպական երիտասարդական ծրագրերի ընձեռած հնարավորությունները, ինչպես նաև կանցկացնեն վիկտորինա։

Ավելի ուշ՝ «Գայլուկ» ընկերության հետ համագործակցությամբ, թատերական հրապարակում կանցկացվի հանրային սպորտային և ժամանցային միջոցառում, իսկ միջոցառումների եզրափակիչը կլինի բացօթյա համերգը՝ YereOne Project բենդի և DJ STAVROS-ի մասնակցությամբ։

«1999 թվականից ՄԱԿ-ը օգոստոսի 12-ը հռչակել է Երիտասարդության միջազգային օր՝ որպես պայմանական հարթակ ևս մեկ անգամ բարձրաձայնելու երիտասարդների հիմնախնդիրները, հարցերը և հետաքրքրությունները։ Մենք ամեն տարի օգտագործում ենք այս առիթը՝ վերհիշելու այն, ինչին երիտասարդները ձգտում են, և այն խնդիրները, որոնց բախվում են։Հատկանշական է, որ այս տարի առաջին անգամ նշվում է երիտասարդության օրը՝ ունենալով ազգային օրենսդրություն, որը կարգավորում է ոլորտը և սահմանում երիտասարդների տարիքային շեմը։ Երիտասարդներին պետք է ավելի մեծ ուշադրություն դարձնել, քանի որ ժողովրդագրական փոփոխությունները բերում են նրան, որ աշխարհի շատ երկրներում, այդ թվում՝ Հայաստանում, փոքրաքանակ երիտասարդները հոգում են ավելի մեծաքանակ և տարիքով մեծ սերնդի կարիքները»,-նշեց ՄԱԿ-ի Բնակչության հիմնադրամի հայաստանյան գրասենյակի ղեկավար Լուսինե Սարգսյանը։

Գյումրիի համայնքապետարանը մշտապես մասնակցել է «Երիտասարդական նախաձեռնությունների կենտրոն» ՀԿ-ի կողմից օրվա խորհրդով կազմակերպվող միջոցառումներին։ 

«Ուրախ եմ, որ այդ համագործակցությունը արդեն տասը տարի շարունակվում է, և ունեմ վստահություն, որ այն կշարունակվի նաև ապագայում։ Համայնքապետարանի անունից պետք է ասեմ, որ մինչ այժմ բոլոր միջոցառումները ֆինանսավորվել են մշակույթի և երիտասարդության բաժնի կողմից։ Իսկ այս տարի ունենք ուրախալի լուր՝ շնորհիվ «Եվրոպան տեղայնացնում է» ծրագրի՝ 2025 թվականից Գյումրու համայնքային բյուջեում նախատեսված է առանձին 10 մլն դրամ՝ ուղղված երիտասարդական նախաձեռնությունների և ծրագրերի իրականացմանը։ Սա մեծ ձեռքբերում է»,-նշեց Գյումրիի համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը: