Գտնվել է վտանգավոր թունաքիմիկատները անզեն աչքով հայտնաբերելու միջոց

Հեֆեյի ֆիզիկական գիտությունների ինստիտուտի (Չինաստանի գիտությունների ակադեմիա) գիտնականները ստեղծել են պիրետրոիդային թունաքիմիկատներ հայտնաբերելու պարզ և արագ մեթոդ՝ օգտագործելով ֆլուորեսցենտային զոնդ: Ռեակցիայի արդյունքը կարելի է տեսնել անզեն աչքով սմարթֆոնի էկրանին 10 վայրկյանում: Ուսումնասիրության արդյունքները հրապարակվել են «Անալիտիկ քիմիա» (Anal Chem) ամսագրում:

Ֆլուորեսցենտային զոնդը փոխում է գույնը ուլտրամանուշակագույն ճառագայթման ազդեցության տակ՝ պիրետրոիդների՝ շատ կենցաղային և գյուղատնտեսական մթերքներում հանդիպող տարածված միջատասպանների հետ շփման ժամանակ: Այս նյութերը արդյունավետ են միջատների դեմ, բայց բարձր կոնցենտրացիաների դեպքում դրանք կարող են գլխապտույտ և շնչառության դժվարություն առաջացնել մարդկանց մոտ:

Տեխնոլոգիան հիմնված է ֆլուորեսցենտային ներկանյութի ռեակցիայի վրա սպիտակուցի հետ. խառնուրդը փայլում է դեղին, իսկ պիրետրոիդների հետ շփման ժամանակ այն արագորեն փոխում է գույնը կանաչի՝ այս անցումը անմիջապես նկատելի է: Զոնդի զգայունությունը թույլ է տալիս հայտնաբերել վնասակար նյութերի նույնիսկ փոքր չափաբաժիններ: Ավելի ճշգրիտ վերլուծության համար բավական է լուսանկարել նմուշը սմարթֆոնով. հատուկ հավելվածը կհաշվարկի թունաքիմիկատների կոնցենտրացիան:

Օդում թունաքիմիկատներ հայտնաբերելու համար գիտնականները զոնդը նաև ինտեգրել են ծակոտկեն աերոգելի մեջ, որը միջատասպանների գոլորշիների հետ շփման ժամանակ գույնը փոխում է նարնջագույնից կանաչի։ Մեթոդը կարող է զգալիորեն պարզեցնել սննդի անվտանգության վերահսկողությունը ֆերմերային տնտեսություններում, շուկաներում և առօրյա կյանքում։ Աշխատանքի հեղինակների խոսքով՝ մշակումը կարող է օգտակար լինել ֆերմերների համար, ովքեր կարող են արագ ստուգել բերքը հենց դաշտում։

Այնուամենայնիվ, հետազոտողները նշում են, որ թեստի ճշգրտության վրա կարող են ազդել այլ քիմիական նյութեր, ինչպիսիք են պարարտանյութերը կամ լվացող միջոցները, որոնք հաճախ խառնվում են թունաքիմիկատների հետ։ Բացի այդ, դեռևս չի ուսումնասիրվել, թե ինչ ճշգրտություն կցուցաբերի զոնդը ծայրահեղ ջերմաստիճաններում։

Թարգմանությունը՝ Lurer.com-ի