Գերմանիայում պեղումների ժամանակ հայտնաբերվել է 13-րդ դարի հազվագյուտ մետաղադրամների գանձ

Բեռլինի պատմական կենտրոնում հայտնաբերվել է 13-րդ դարի արծաթե մետաղադրամների գանձ։ Հայտնագործությունը կատարել են Բեռլինի հուշարձանների պաշտպանության պետական գրասենյակի աշխատակիցները Մոլկենմարկտում իրականացված լայնածավալ պեղումների ժամանակ, որը քաղաքի կենտրոնում ամենամեծ հնագիտական նախագիծն է։ Արդյունքները հրապարակվել են Arkeonews թերթի կողմից։

Գանձը բաղկացած է հինգ ամբողջական դենարից և մեկ կես դենարից, որոնցից յուրաքանչյուրը մոտ 1.5 սանտիմետր տրամագծով է։ Մետաղադրամները թվագրվում են 13-րդ դարի երկրորդ կեսին՝ Ասկանիայի մարգրաֆներ Օտտո IV-ի և Օտտո V-ի գահակալության ժամանակաշրջանին։ Դրանց դիմերեսին պատկերված է մարկգրաֆը, որը կանգնած է երկու գմբեթավոր աշտարակների միջև, իսկ հակառակ կողմում՝ թագադրված արծիվ՝ իշխանության և ինքնիշխանության խորհրդանիշ։

Պետական վերականգնող և գրասենյակի տնօրեն Քրիստոֆ Ռաուհուտի խոսքով՝ սրանք Մոլկենմարկտում հայտնաբերված առաջին նմանատիպ մետաղադրամներն են։ Դրանք կարևոր ապացույցներ են միջնադարյան Բեռլինի ձևավորման մասին։

Նշվում է, որ Մոլկենմարկտում պեղումները ընդգրկում են մոտ 22 հազար քառակուսի մետր տարածք և իրականացվում են մինչև չորս մետր խորությամբ։ Աշխատանքների ընթացքում պեղվել է ավելի քան 88 հազար խորանարդ մետր պատմական հող, որը կատարելապես պահպանվել է 20-րդ դարում ստեղծված մեկուսացման շնորհիվ։ Այստեղ նախկինում հայտնաբերվել են 13-րդ դարի պաշտպանական խրամատներ, փայտե նկուղներ, տների, վառարանների և դարբնոցների մնացորդներ, ինչպես նաև 13-րդ դարի 50 մետր երկարությամբ ճանապարհ։

Հայտնաբերված ավելի քան 700 հազար արտեֆակտների շարքում կան դարերի ընթացքում քաղաքաբնակների առօրյա կյանքը արտացոլող իրեր՝ 14-րդ դարի ոսկրային ֆլեյտա, 15-րդ դարի մետաքսե ժապավեն, 17-րդ դարի խաղալիքներ, 18-րդ դարի կոշիկներ, ամանեղեն, գործիքներ և զենքի կայծքարեր։ Գտածոների բարձր պահպանման աստիճանը բացատրվում է 20-րդ դարի կեսերին Բեռլինի արդիականացման ընթացքում մշակութային շերտը պաշտպանելու միջոցառումներով։

Մինչ օրս ուսումնասիրվել է պեղված տարածքի ավելի քան 70%-ը։ Դաշտային աշխատանքներն ավարտելուց հետո գիտնականները կանցկացնեն գտածոների մանրամասն վերլուծություն, որը թույլ կտա ավելի խորը հասկանալ քաղաքի պատմությունը և զարգացումը միջնադարից մինչև մեր օրերը։

Թարգմանությունը՝ Lurer.com-ի