Ռուբլու փոխարժեքի ապագան կախված է Ալյասկայի բանակցությունների արդյունքից

Freedom Finance Global-ի վերլուծաբան Վլադիմիր Չեռնովի գնահատմամբ՝ ՌԴ և ԱՄՆ նախագահների սպասվող բանակցությունների արդյունքը կարող է զգալիորեն ազդել ռուբլու փոխարժեքի վրա։ Նրա խոսքով՝ ավանդաբար բարդ համարվող օգոստոսին ռուբլին արդեն ճնշման տակ է սեզոնային բարձր ներմուծման, արձակուրդային շրջանի և Ռուսաստանի Բանկի դրամավարկային քաղաքականության մեղմացման պատճառով։

Չեռնովը կանխատեսում է երեք սցենար․ չեզոք արդյունքի դեպքում ռուբլին կպահպանվի 11,0–11,3-ի սահմաններում յուանի նկատմամբ, բացասական՝ հնարավոր լրացուցիչ պատժամիջոցների դեպքում կթուլանա մինչև 11,8–12,0, իսկ դրական՝ լարվածության նվազման ֆոնին կարող է ամրանալ մինչև 10,5–10,8։

Մասնագետը նշում է, որ նավթի գնի անկումը նվազեցնում է երկրի արտահանման եկամուտները և խորացնում արժույթի դեֆիցիտը, ինչի հետևանքով առանց կառուցվածքային բարեփոխումների ռուբլին մնում է խոցելի։ Օգոստոսի 12-ի պաշտոնական փոխարժեքով մեկ յուանը կազմել է 11,05 ռուբլի։