ԱՄՆ-ն ու Չինաստանը 90 օրով երկարացրել են մաքսային «հրադադարը»՝ կանխելով սակագների կտրուկ աճը

ԱՄՆ նախագահ Դոնալդ Թրամփը և Չինաստանը համաձայնեցրել են 90 օրով երկարացնել միմյանց ապրանքների մաքսային բարձրացումների դադարեցումը՝ կանխելով մաքսատուրքերի վերադարձը ռեկորդային մակարդակների, որոնք կարող էին գործնականում կաթվածահար անել աշխարհի երկու խոշորագույն տնտեսությունների միջև առևտուրը։ Առանց այս համաձայնության՝ օգոստոսի 12-ին չինական ապրանքների մաքսատուրքը ԱՄՆ-ում պետք է բարձրանար 30%-ից մինչև 54%, իսկ Չինաստանի մաքսատուրքը ամերիկյան արտահանման վրա՝ 10%-ից մինչև 34%, գրում է CNN-ը։

Երկկողմ հայտարարությամբ Պեկինը հաստատել է, որ պահպանելու է գործող 10% մաքսատուրքը ամերիկյան ապրանքների համար։ Ընդունված որոշումը հետևել է Շվեդիայում հուլիսին կայացած բանակցություններին, որոնք Վաշինգտոնում գնահատվել են որպես «կառուցողական»։ Թրամփը, սակայն, հիշեցրել է, որ առանց իր հաստատման ոչ մի պայմանագիր վերջնական չէր համարվի։ Միևնույն ժամանակ Վաշինգտոնը շարունակել է զգուշացնել Պեկինին ռուսական նավթի գնումների և Ռուսաստանի ռազմական ոլորտին հնարավոր աջակցություն ցուցաբերող երկակի նշանակության տեխնիկայի վաճառքի մասին։

Չլուծված են մնում նաև մի շարք հարցեր՝ Չինաստանի՝ TikTok-ի սեփականության հարցում զիջումներ անելու պահանջից մինչև հազվագյուտ մագնիսների արտահանման պայմանավորվածությունների պահպանում։ Վերլուծաբանների խոսքով՝ Վաշինգտոնը վերջին շաբաթներին ավելի մեղմ է մոտեցել Պեկինի հետ հարաբերություններին՝ հույս ունենալով, որ համաձայնությունը կարող է ճանապարհ հարթել Սի Ցզինպինի և Թրամփի հնարավոր հանդիպման համար։