Տարածաշրջանում ԱՄՆ-ի նպատակն է սադրել Երևանին և Բաքվին հանդես գալ Մոսկվայի դեմ․ Ադրբեջանում Իրանի նախկին դեսպան

Կասկած չկա, որ նպատակը տարածաշրջանում Իրանին թուլացնելն ու մեկուսացնելն է։ Սակայն Իրանը Հարավային Կովկասի հետ Արաքս գետի երկայնքով կիսում է ավելի քան 400 կմ սահման, ինչը նշանակում է, որ Իրանն ունի ամենաերկար սահմանը Հարավային Կովկասում: Այս մասին Mehr գործակալությանը տված հարցազրույցում հայտարարել է Ադրբեջանում Իրանի նախկին դեսպան Մոհսեն Փաքաինը:

«Ոչ մի երկիր չի գերիշխում այդ միջանցքում այնքան, որքան Իրանը, և ոչ մի օտար պետություն չի կարող որևէ կոնկրետ նախաձեռնություն ձեռնարկել Իրանի դեմ այս ոլորտում: Եթե Արևմուտքը մտնի այդ տարածաշրջան, ապա իրեն լուրջ վտանգի կենթարկի և լուրջ խոցելիությունների կբախվի», - ասել է իրանցի դիվանագետը։ Նրա կարծիքով, ԱՄՆ-ն ռազմական հակամարտության մեջ չի մտնի Հարավային Կովկասի ոչ մի երկրի հետ, ճիշտ այնպես, ինչպես նրանք անմիջականորեն հակամարտության մեջ չեն մտել Ռուսաստանի հետ Ուկրաինայում, «այլ Ուկրաինան օգտագործել են որպես խայծ Ռուսաստանին դիմակայելու համար»:

«Կովկասում ԱՄՆ-ի ներկայության հիմնական նպատակը Ռուսաստանին և տարածաշրջանի երկրներին  մեկուսացնելն է, այդ թվում Ադրբեջանին և Հայաստանին հրահրել Ռուսաստանի դեմ հանդես գալ, հատկապես այս փուլում, քանի որ Հայաստանի և Ադրբեջանի հարաբերությունները Ռուսաստանի հետ սառել են։ Այդ պատճառով Ռուսաստանը, հավանաբար, վճռական կարձագանքի, և այդպես պարզապես Կովկասը չի կորցնի։ Իհարկե, եթե Ռուսաստանը ոչ մի գործողություն չձեռնարկի, Իրանը միայնակ կարող է խանգարել ԱՄՆ-ի նպատակների իրագործմանը», - նշել է Փաքաին։