IT ոլորտի առաջնորդները Սիլիկոնյան հովտում սկսում են «գենետիկ սուպերկաստայի» ստեղծում

Սիլիկոնյան հովտի IT առաջնորդները սկսել են ներդրումներ անել նոր սերնդի ստեղծման մեջ՝ կիրառելով առաջատար գենետիկ թեստավորման տեխնոլոգիաներ՝ ոչ միայն առողջության, այլև ինտելեկտի կանխատեսման համար։ The Wall Street Journal-ի տվյալներով՝ Nucleus Genomics և Herasight ստարտափները առաջարկում են էմբրիոնների գենետիկ ստուգումներ, որոնք գնահատում են ապագա երեխայի հնարավոր IQ-ն։ Ծառայության արժեքը տատանվում է 6 հազարից մինչև 50 հազար դոլար։ «Կրեմնիե հովտում սիրում են IQ»,- նշել է Nucleus Genomics-ի հիմնադիր Քիան Սադեգին։

Սան Ֆրանցիսկոյից IT մասնագետների մի զույգ ստեղծել է բարդ գնահատման համակարգ՝ ընտրելու «օպտիմալ» էմբրիոնը՝ հաշվի առնելով հիվանդությունների ռիսկերը և կանխատեսվող ինտելեկտը։ Նրանց դուստրը ծնվել է այն էմբրիոնից, որն ուներ երրորդ ամենաբարձր IQ կանխատեսումը, բայց՝ առավելագույն ընդհանուր գնահատականը։ Ստենֆորդի իրավունքի և կենսագիտությունների կենտրոնի տնօրեն Հենկ Գրիլին զգուշացնում է. «Սա գիտաֆանտաստիկայի սցենար է, որտեղ միլիարդատերերը ձևավորում են գենետիկ սուպերկաստա, որը կարող է ստանձնել իշխանությունը»։

Ամենաարմատական մոտեցումն ունեն Բերկլիի «ռացիոնալիստ» գիտնականները, որոնք վստահ են, որ գենետիկ ընտրությունը կարող է օգնել կանխել արհեստական ինտելեկտի սպառնալիքները։ Նրանց կարծիքով՝ ավելի խելացի սերունդը կամ կկարողանա վերահսկել AI-ը, կամ կհամոզի մարդկությանը հրաժարվել դրա զարգացումից։ Սակայն այս միտումը հարուցում է լուրջ էթիկական հարցեր և մտահոգություններ՝ կապված սոցիալական անհավասարության խորացման ու «գենետիկ էլիտայի» առաջացման հետ։