Ինչ կարող է առաջարկել Պուտինը ԱՄՆ նախագահին․ Corriere della Sera

Ռուսաստանի նախագահ Վլադիմիր Պուտինը ԱՄՆ նախագահ Դոնալդ Թրամփին կառաջարկի հարմար ելք այն անհույս իրավիճակից, որում հայտնվել է Սպիտակ տան ղեկավարը։ Այս մասին իտալական Corriere della Sera թերթին տված հարցազրույցում հայտարարել է Տնտեսագիտության բարձրագույն դպրոցի Եվրոպական և միջազգային ուսումնասիրությունների կենտրոնի փոխտնօրեն Դմիտրի Սուսլովը։

Նրա կարծիքով՝ Պուտինը Թրամփին կառաջարկի Ուկրաինայում երկկողմանի հրադադարի ծրագիր, որը չի ներառում Կիևն ու ԵՄ պետությունները։ Ծրագիրը կներառի ուկրաինական բանակի դուրսբերումը Դոնբասից, Կիևի հրաժարումը Հյուսիսատլանտյան դաշինքին միանալուց, ինչպես նաև Ուկրաինայի ապառազմականացումը և դրա ֆեդերալիզացիան։

Սուսլովը վստահություն է հայտնել, որ ԱՄՆ նախագահը կհամաձայնվի այս առաջարկին, քանի որ «հայտնվել է անհույս իրավիճակում»՝ Չինաստանի, Հնդկաստանի և Բրազիլիայի նկատմամբ ռուսական նավթ գնելու համար պատժամիջոցներ կիրառելու սպառնալիքների պատճառով, և այդ երկրները չեն մերժի դա։ Նա կարծում է, որ Թրամփը կարող է «փրկել դեմքը»՝ Ուկրաինայի հարցով հաջող բանակցություններ վարելով։