Գերմանական արևային էներգիայի ոլորտը նախազգուշացնում է սուբսիդիաների կրճատման վտանգների մասին

Գերմանիայի արևային էներգիայի ոլորտի ներկայացուցիչները զգուշացրել են, որ փոքր տանիքային ֆոտովոլտային կայանների համար պետական սուբսիդիաների դադարեցումը կարող է վտանգել երկրի կլիմայական նպատակները։ Այս առաջարկը ներկայացրել է տնտեսության նախարար Կատարինա Ռայխեն՝ նշելով, որ նման համակարգերը, որոնք հիմնականում տեղադրվում են մասնավոր տներում, արդեն շահութաբեր են և այլևս չեն պահանջում հանրային աջակցություն։

Գերմանիայում ֆոտովոլտային սուբսիդիաները ներդրվել էին 25 տարի առաջ՝ վերականգնվող էներգետիկայի զարգացումը խթանելու նպատակով, և նպաստել են 2030-ին երկրի էլեկտրաէներգիայի սպառման 80%-ը վերականգնվող աղբյուրներից ստանալու ծրագրին։ Սակայն ոլորտի մասնագետների խոսքով՝ սուբսիդիաները կարևոր են ֆինանսավորման համար, և դրանց բացակայության դեպքում տների տերերի միայն 40%-ը կդիմի արևային համակարգերի տեղադրման։

Սուբսիդիաների կրճատման գաղափարը նաև հակասում է տարվա սկզբին ձևավորված կոալիցիայի քաղաքական պայմանավորվածություններին։ SPD-ի էներգետիկ քաղաքականության ներկայացուցիչ Նինա Շեերի խոսքով՝ անհրաժեշտ է զարգացնել պահեստավորման համակարգերը և խուսափել ոլորտում անորոշություն ստեղծելուց։ Արևային ոլորտի զարգացումը արդեն իսկ կանգնած է պահանջարկի նվազման, տոկոսադրույքների աճի և տնտեսական անկայունության առաջ, ինչի ֆոնին ոլորտի խաղացողները կարևորում են կայուն և կանխատեսելի կարգավորումները, հայտնում է Reuters-ը։