«Վրաստանը մեսխեթցի թուրքերի հայրենիքն է»․ Էրդողանը՝ նախագահ Կավելաշվիլիին

Օգոստոսի 12-ին Վրաստանի նախագահ Միխեիլ Կավելաշվիլին այցելել է Թուրքիա և հանդիպել Ռեջեփ Թայիփ Էրդողանի հետ։ Հանդիպումից հետո տեղի է ունեցել մամուլի ասուլիս, հաղորդում է radiotavisupleba–ն։

Նրանք ողջունել են Դոնալդ Թրամփի միջնորդությամբ Վաշինգտոնում Ադրբեջանի և Հայաստանի միջև ձեռք բերված համաձայնագիրը և քննարկել թուրք-վրացական հարաբերությունները։

Էրդողանի խոսքով՝ ինքը Կավելաշվիլիին փոխանցել է իր ակնկալիքները «մեսխեթցի թուրքերի՝ իրենց պատմական հողեր արժանապատիվ և անվտանգ վերադարձի» վերաբերյալ։

Նա նշել է. «Վրաստանը մեսխեթցի թուրքերի հայրենիքն է, որոնք 1944 թվականի նոյեմբերին բռնի կերպով տեղահանվել են իրենց պատմական հայրենիքից։ Ես նախագահ Կավելաշվիլիին փոխանցեցի մեր ակնկալիքները մեսխեթցի թուրքերի՝ իրենց պատմական օջախներ արժանապատիվ և անվտանգ վերադարձի վերաբերյալ, և մենք՝ որպես թուրքեր, արժանի աջակցություն կցուցաբերենք այս գործընթացին»։

Մեսխեթցի թուքերը տեղահանվել են Միջին Ասիա Վրաստանի Խորհրդային Սոցիալիստական Հանրապետության Մեսխեթ շրջանից 1944 թվականի նոյեմբերի 14-ին։ Արտաքսման ժամանակ 92,307-94,955 մեսխեթցի թուրքեր բռնի տեղահանվել են 212 գյուղերից։