Ռուսաստանի արտահանողները կարող են ամբողջ արտարժութային եկամուտը պահել իրենց հաշվին

ՌԴ կառավարությունը զրոյացրել է արտահանողների պարտադիր արտարժութային եկամուտի վերադարձի և վաճառքի նորմատիվը։ Վարչապետ Միխայիլ Միշուստինի ստորագրած որոշման մեջ նշվում է, որ այս քայլը պայմանավորված է ազգային արժույթի փոխարժեքի կայունացմամբ և արտարժույթի լիկվիդայնության խնդիրների բացակայությամբ։ Այժմ ընկերությունները կարող են ամբողջ արտարժութային եկամուտը պահել իրենց հաշիվներում։

Պարտադիր վաճառքի պահանջը սահմանվել էր 2023 թվականի հոկտեմբերին՝ Ռուսաստանի նախագահ Վլադիմիր Պուտինի հրամանագրով, ռուբլու փոխարժեքի անկման ֆոնին։ Այն վերաբերում էր վառելիքաէներգետիկ համալիրի, սև և գունավոր մետալուրգիայի, քիմիական ու փայտամշակման արդյունաբերության, ինչպես նաև հացահատիկային տնտեսության ընկերություններին։

Հետագայում նորմատիվները աստիճանաբար նվազեցվել էին, և օգոստոսի 14-ի դրությամբ արտահանողները պարտավոր էին հաշվեհամարներում պահել առնվազն ստացված արտարժույթի 40 տոկոսը և ներքին շուկայում վաճառել այդ գումարի առնվազն 90 տոկոսը։ Ավելի վաղ «Ռոսֆինմոնիտորինգ»-ի ղեկավար Յուրի Չիխանչինը հայտնել էր, որ արտահանողները գերակատարում են արտարժույթի վաճառքի պլանը, և պահանջը դարձել է ավելորդ․ հուլիսին վաճառքները հասել էին մոտ 70 տոկոսի։