Պատրաստ ենք համագործակցության. Շիրակի մարզպետը՝ սպորտի վաստակավոր վարպետ Ռոբերտ Էմմիյանին

Շիրակի մարզպետ Դավիթ Առուշանյանն աշխատակազմի պատասխանատուների հետ այսօր հյուրընկալել է ծնունդով գյումրեցի, Հայաստանի աթլետիկայի ֆեդերացիայի նախագահ, հեռացատկի Եվրոպայի չեմպիոն և ռեկորդակիր, աշխարհի փոխչեմպիոն, Բարի կամքի խաղերի չեմպիոն, մարզասրահներում Եվրոպայի առաջնությունների կրկնակի հաղթող, սպորտի վաստակավոր վարպետ Ռոբերտ Էմմիյանին։ Այս մասին հայտնել են Շիրակի մարզպետի աշխատակազմից։

Շիրակի մարզպետը ողջունել է անվանի հեռացատկորդին, շնորհակալություն հայտնել մեր երկրի պատիվը միջազգային հարթակներում բարձր պաhելու համար․

«Ուրախ եմ ձեզ տեսնել հարազատ քաղաքում՝ լի էներգիայով և նոր նախաձեռնություներ կյանքի կոչելու պատրաստակամությամբ։ Արթուր Ալեքսանյանի անվան մարզական համալիրը, նաև իմ ջանքերով, ունենալու է միջազգային չափանիշներին համապատասխան աթլետիկայի վազքուղի, ինչն էլ հնարավորություն կտա մեր մարզի երիտասարդներին առավել լավ արդյունքներ գրանցել և մրցաշարեր անցկացնել մեր մարզում։ Վստահեցնում եմ՝ Շիրակի մարզպետի աշխատակազմը և անձամբ ես, իրավասությունների շրջանակներում, պատրաստ ենք համագործակցության»։

Ռոբերտ Էմմիյանը երախտագիտությունն է հայտնել մարզպետին ջերմ ու անմիջական ընդունելության համար, նշել, որ ոգևորիչ է գտնվել հայրենի քաղաքում և ամենուրեք տեսնել դրական տեղաշարժ։

Հանդիպման ընթացքում քննարկվել են 2027 թվականին Հյաստանում Ֆրանկոֆոնյան 10-րդ մարզական խաղերի նախապատրաստական աշխատանքներին առնչվող մի շարք հարցեր։ Նշենք, որ խաղերի ծրագրում ընդգրկված են նաև աթլետիկական մարզաձևերը։

Ռոբերտ Էմմիյանն իր անվան միջազգային մրցաշարի գավաթը հանձնել է Դավիթ Առուշանյանին՝ ակնկալիքով, որ հաջորդ տարի մրցաշարն անցկացվելու է Գյումրիում։