Ռուսաստանի էլեկտրաէներգիայի արտահանումը Չինաստան հասել է պատմական մինիմումի

«Կոմերսանտ»-ի տվյալներով՝ 2025 թվականի առաջին կեսում Ռուսաստանի էլեկտրաէներգիայի արտահանումը Չինաստան կրճատվել է 60 տոկոսով՝ հասնելով ընդամենը 200 միլիոն կիլովատ/ժամի, ինչը պատմական նվազագույն ցուցանիշն է։ Համեմատության համար՝ 2010-2020 թվականներին միջին տարեկան մատակարարումները կազմել են մոտ 3 միլիարդ կիլովատ/ժամ։

Գլխավոր պատճառը, ըստ «Ինտեր ՌԱՕ»-ի հաշվետվության, արտադրական հզորությունների պակասն է։ Արևելքի միավորված էներգահամակարգը զգում է հզորության դեֆիցիտ, ինչի հետևանքով հնարավոր չէ ապահովել պլանային ծավալները։ Չինաստանի մաքսային վիճակագրության համաձայն՝ միայն հունիսին արտահանումը կազմել է 14,4 միլիոն կիլովատ/ժամ։ Նվազում է նկատվում նաև Ղազախստանի ուղղությամբ մատակարարումներում՝ 12,5 տոկոսով։

Փորձագետների գնահատմամբ՝ տարվա արդյունքներով ընդհանուր արտահանման կրճատումը կարող է հասնել 8 տոկոսի։ Բացի արտադրական խնդիրներից, Չինաստանին մատակարարումների նվազմանը նպաստում է նաև սպառման անկումը։ ՌԴ էներգետիկայի նախարարը նախկինում նշել էր, որ ոլորտը տուժում է ֆինանսավորման պակասից և սարքավորումների հնացումից, իսկ խորհրդային պահուստներն արդեն սպառված են։