«Իրավունք». «Ես քիչ եմ կրակն ընկել, հիմա էլ ինքն ընկնի»

Թերթը գրում է. «Հանրային հեռուստաընկերության «Լրացուցիչ ժամանակ» ծրագրի ընթացքում ՀՖՖ նախագահ Ռուբեն Հայրապետյանը, պատասխանելով բազում անգամներ քննարկման առարկա դարձած այն հարցին, թե երբ կշահագործվի «Հրազդանը» ասել էր, որ ինքը ցանկացել է վերանորոգել մարզադաշտը, բայց որևէ երաշխիք չունի, որ վերականգնումից հետո «մարզադաշտում սեղաններ չեն դրվելու, և լուսատախտակի մոտ կենաց չեն ասելու»:ՀՖՖ նախագահի՝ իրեն բնորոշ այս պատասխանից հետո, ասում են, ՀՀԿ-ական Աշոտ Աղաբաբյանը նեղացել է ՀՖՖ նախագահից։ Պարզելու համար այդպես է թե ոչ, և թե ճիշտ են արդյոք շրջանառվող խոսակցությունները այն մասին, որ այս «հողի» վրա լեզվակռիվ է եղել Նեմեց Ռուբոյի ու հանրահայտ Բուռնաշի միջև, զանգահարեցինք երկու պատգամավորներին էլ: Առաջինը հաջողվեց կապ հաստատել «Հրազդան» տոնավաճառի սեփականատեր Աշոտ Աղաբաբյանի հետ, ով մեր հարցին ի պատասխան ասաց.

-Ոչ մի տենց բան, տարաձայնություն չկա: Իսկ իրա հետ ընկեր եմ, տենց բան հնարավոր չի: Բայց ի՞նչ խնդիր պըտի ունենաք մենք:

-Դե ասում են, որ «Հրազդան» մարզադաշտը կռվախնձոր է դարձել Ձեր և ՀՖՖ նախագահի միջև:

-Մենք տենց ոչ մի խոսակցություն ոչ ունեցել են, ոչ էլ, ի՞նչ ա:

-Այնուամենայնիվ, չեն դադարում խոսակցությունները այն մասին, որ Ռուբեն Հայրապետյանը ուզում է վերցնել «Հրազդան» մարզադաշտը՝ ավելի նպատակային օգտագործելու համար:

-Բայց իրա ինչին ա պետք, ես քիչ եմ կրակն ընկել, հիմա էլ ի՞նքը կրակն ընկնի...»։