Արարատի մարզում վերականգնվել է պետությանը պատճառված 455 հազար դոլարին համարժեք դրամի վնասը

Գլխավոր դատախազ Աննա Վարդապետյանը յուրաքանչյուր տարվա ավարտից հետո, այցելում է Հայաստանի Հանրապետության դատախազության տարածքային ստորաբաժանումներ, ամփոփում է Դատախազության կատարած աշխատանքներն ու սահմանում հաջորդ տարվա առաջնահերթությունները:

2025 թվականի փետրվար-մարտ ամիսներին ՀՀ գլխավոր դատախազն աշխատանքային այցով եղել է Դատախազության շուրջ 15 ստորաբաժանումներում, իսկ 2025 թվականի մարտի 14-ին տեղի է ունեցել ՀՀ դատախազության կոլեգիայի ամփոփիչ նիստը:

Նիստի ընթացքում Աննա Վարդապետյանը տեղեկացրել է, որ այսուհետ տարեկան երկու անգամ (հուլիսի վերջին՝ կիսամյակային և փետրվարին` տարեկան) կատարվելու է մարզերի և Երևան քաղաքի վարչական շրջանների դատախազությունների աշխատանքի գնահատում՝ հիմք ընդունելով հետևյալ 4 չափանիշները՝

• Պետական և համայնքային շահերի պաշտպանության հայցերով պետությանը և համայնքին վերջնական դատական ակտով վերադարձված գումարի չափը:
• Քրեական վարույթներով, ինչպես նաև դատախազական ներգործության միջոցների կիրառմամբ պետությանը, համայնքին, պետական և համայնքային մասնակցությամբ կազմակերպություններին պատճառված վնասի վերականգնման գումարի չափը:
• Ծանր և առանձնապես ծանր հանցագործություններով մեղադրական եզրակացությամբ դատարան հանձնված քրեական վարույթների թիվը:
• Ծանր և առանձնապես ծանր հանցագործություններով վերջնական դատական ակտերի թիվը:

Գնահատման կարգն ու չափանիշները սահմանվել են ՀՀ գլխավոր դատախազի հրամանով, որի հիման վրա՝ 2025 թվականի հուլիս ամսվա ընթացքում ամփոփվել են մարզերի և Երևան քաղաքի վարչական շրջանների դատախազությունների աշխատանքները:

Նշված չորս չափանիշներով կատարված գնահատման հիման վրա՝ որոշվել են 2025 թվականի առաջին կիսամյակի ընթացքում լավագույն ցուցանիշներն արձանագրած ստորաբաժանումները: Այսպես, 1-ին հորիզոնականը զբաղեցրել է Արարատի մարզի դատախազությունը, 2-րդ տեղում Սյունիքի մարզի դատախազությունն է, 3-րդ տեղում Արմավիրի մարզի դատախազությունը, իսկ 4-5-րդ հորիզոնականները հավասար ցուցանիշներով զբաղեցրել են Գեղարքունիքի և Տավուշի մարզերի դատախազությունները:

Մասնավորապես՝

1. Արարատի մարզում, դատախազական ակտերի կիրառման արդյունքում, համայնքին է վերադարձվել 1 անշարժ գույք, վերականգնվել է պետությանը և համայնքին պատճառված 455 հազար ԱՄՆ դոլարին համարժեք դրամի վնաս

Արարատի մարզում, 2025 թվականի առաջին կիսամյակում, վերականգնվել է պետությանը և համայնքին պատճառված՝ շուրջ 455 հազար ԱՄՆ դոլարին համարժեք 175 միլիոն դրամի վնաս, այդ թվում՝ պետական (համայնքային) շահերի պաշտպանության լիազորության շրջանակներում, դատախազի միջնորդագրի հիման վրա, համայնքին է վերադարձվել 22 միլիոն 553 հազար դրամ արժողությամբ 1 անշարժ գույք:

Մասնավորապես՝ պետական (համայնքային) շահերի պաշտպանության լիազորության շրջանակում, Արարատի մարզի դատախազության կողմից կատարված ուսումնասիրությունների արդյունքում ներկայացված միջնորդագրի հիման վրա, Արարատ համայնքի սեփականության իրավունքն է վերականգնվել Սուրենավան բնակավայրի Բարեկամության փողոցի 23/3 հասցեում գտնվող՝ 625.33 քմ մակերեսով համայնքի մանկապարտեզի մասնաշենքի և դրանով ծանրաբեռնված 0.15878 հա մակերեսով հողատարածքի նկատմամբ:

2025 թվականի առաջին կիսամյակի ընթացքում Արարատի մարզի դատախազության դատախազների կողմից հաստատված մեղադրական եզրակացությամբ դատարան է հանձնվել ծանր հանցագործություններով 45, իսկ առանձնապես ծանր հանցագործություններով 14 քրեական վարույթներ:

2. Սյունիքի մարզում, դատախազական ներգործության արդյունքում, վերականգնվել է 51 հազար ԱՄՆ դոլարին համարժեք դրամ, քրեական վարույթներով՝ 93 հազար ԱՄՆ դոլարին համարժեք դրամ

Սյունիքի մարզում, 2025 թվականի առաջին կիսամյակում, պետական (համայնքային) շահերի պաշտպանության հայց հարուցելու լիազորության շրջանակում իրականացված ուսումնասիրություններով, մարզի դատախազների կողմից ներկայացված նախազգուշացումների հիման վրա՝ վերականգնվել է պետությանը պատճառված՝ 51 հազար ԱՄՆ դոլարին համարժեք 19 միլիոն 833 հազար դրամ:

Նույն ժամանակահատվածում, քրեական վարույթներով վերականգնվել է պետությանը պատճառված՝ 93 հազար ԱՄՆ դոլարին համարժեք 35 միլիոն 924 հազար դրամ:

2025 թվականի առաջին կիսամյակի ընթացքում Սյունիքի մարզի դատախազության դատախազների կողմից հաստատված մեղադրական եզրակացությամբ դատարան է հանձնվել ծանր հանցագործություններով 11, իսկ առանձնապես ծանր հանցագործություններով 6 քրեական վարույթներ:

3. Արմավիր. 338 հազար ԱՄՆ դոլարին համարժեք դրամ է փոխանցվել Վերականգնված միջոցների միասնական հաշվին` որպես պետությանը պատճառված վնաս

2025 թվականի առաջին կիսամյակում, Արմավիրի մարզի դատախազության հսկողության ներքո քննվող քրեական վարույթների շրջանակներում, ընդհանուր առմամբ վերականգնվել է հանցագործությամբ պետությանը (համայնքին) պատճառված շուրջ 338 հազար ԱՄՆ դոլարին համարժեք 130 միլիոն դրամի վնաս, որն ամբողջությամբ փոխանցվել է Վերականգնված միջոցների միասնական հաշվին:

2025 թվականի առաջին կիսամյակի ընթացքում Արմավիրի մարզի դատախազության դատախազների կողմից հաստատված մեղադրական եզրակացությամբ դատարան է հանձնվել ծանր հանցագործություններով 52, իսկ առանձնապես ծանր հանցագործություններով 7 քրեական վարույթներ:

4. Գեղարքունիքի մարզում, դատախազի միջնորդագրի հիման վրա, Մարտունի համայնքին է վերադարձվել 320.000 ԱՄՆ դոլար արժեքով մարզադաշտը, առաջին կիսամյակում վերականգնվել է 17,3 միլիոն դրամի վնաս

Գեղարքունիքի մարզում, 2025 թվականի առաջին կիսամյակում, պետական և համայնքային շահերի պաշտպանության հայցերով (վերջնական դատական ակտերով) բավարարվել է 33.9 միլիոն դրամի գույքային հայց, որից 3 միլիոն դրամն արդեն փոխանցվել է պետական բյուջե:

Նույն ժամանակահատվածում, քրեական վարույթներով վերականգնվել է 14.3 միլիոն դրամի վնաս:

Գլխավոր դատախազությունը տեղեկացրել էր, որ քրեական վարույթի շրջանակում՝ դատախազի կողմից ներկայացված միջնորդագրի հիման վրա, Գեղարքունիքի մարզի Մարտունի համայնքի սեփականության իրավունքն է վերականգնվել նույն համայնքի Գետափնյա 2-րդ փողոց 22 հասցեում գտնվող մարզադաշտի 6.5 հա հողամասի նկատմամբ: Շուկայականին մոտարկված կադաստրային արժեքը՝ 320 հազար ԱՄՆ դոլարին համարժեք 123 միլիոն 224 հազար դրամ:

2025 թվականի առաջին կիսամյակի ընթացքում Գեղարքունիքի մարզի դատախազության դատախազների կողմից հաստատված մեղադրական եզրակացությամբ դատարան է հանձնվել ծանր հանցագործություններով 18, իսկ առանձնապես ծանր հանցագործություններով 4 քրեական վարույթներ:

5. Տավուշի մարզում, 2025 թվականի առաջին կիսամյակում, այդ թվում՝ պետական (համայնքային) շահերի պաշտպանության լիազորության շրջանակում, Դիլիջան և Իջևան համայնքներին են վերադարձվել 2 մանկապարտեզների մասնաշենքերը

Տավուշի մարզում, 2025 թվականի առաջին կիսամյակում, քրեական վարույթներով վերականգնվել է 39 միլիոն 811 հազար դրամի վնաս, ինչպես նաև պետական մասնակցությամբ ընկերությանն (ՋՕԸ) է վերադարձվել ընդհանուր 5 միլիոն 110 հազար դրամ արժեքով 191.1 մ երկարությամբ խողովակաշար։

Հաշվետու ժամանակահատվածում, պետական (համայնքային) շահերի պաշտպանության լիազորության շրջանակում իրականացված ուսումնասիրության հիման վրա նախաձեռնված քրեական վարույթով, Դիլիջան համայնքի Շահումյան փողոցի թիվ 34 հասցեում գտնվող՝ 85 միլիոն 935 հազար դրամ շուկայականին մոտարկված կադաստրային արժեքով, 891,1 քմ մակերեսով անշարժ գույքը՝ մանկապարտեզի մասնաշենքը, վերադարձվել է Դիլիջան համայնքին։

Նույն ժամանակահատվածում, պետական (համայնքային) շահերի պաշտպանության լիազորության շրջանակում, դատախազական ներգործության արդյունքում, Իջևան համայնքի իրավասու մարմինների կողմից ձեռնարկված միջոցառումներով, Իջևան համայնքին է վերադարձվել նույն համայնքի Խաշթառակ բնակավայրի 9-րդ փողոց 11 հասցեում գտնվող մանկապարտեզի՝ 198,45 քմ մակերեսով մասնաշենքը (շուկայականին մոտարկված կադաստրային արժեքը՝ 44 միլիոն 121 հազար դրամ)։

Տավուշի մարզում, 2025 թվականի առաջին կիսամյակում, պետությանը և համայնքին պատճառված վնասի՝ վերջնական դատական ակտերով վերականգնված գումարի չափը կազմել է 2 միլիոն 761 հազար դրամ:

2025 թվականի առաջին կիսամյակի ընթացքում Տավուշի մարզի դատախազության դատախազների կողմից հաստատված մեղադրական եզրակացությամբ դատարան է հանձնվել ծանր հանցագործություններով 10, իսկ առանձնապես ծանր հանցագործություններով 5 քրեական վարույթներ:

Նշենք, որ պետական և համայնքային  շահերի պաշտպանության հայցերով պետությանը և համայնքին վերջնական դատական ակտով թվերը չեն ներառում ՀՀ գլխավոր դատախազության պետական շահերի պաշտպանության վարչության կողմից կատարված աշխատանքները: