Air Canada-ն կասեցրել է բոլոր թռիչքները՝ բորտուղեկցորդների գործադուլի պատճառով

Air Canada-ն շաբաթ օրը ամբողջությամբ կասեցրել է իր աշխատանքը, երբ ավելի քան 10 հազար բորտուղեկցորդներ գործադուլ հայտարարեցին՝ պայմանագրային բանակցությունների ձախողումից հետո։ Գործադուլը, որը սկսվել է գագաթնակետային ամառային շրջանի ընթացքում, վտանգի տակ է դրել օրական շուրջ 130 հազար ուղևորի ճանապարհորդությունը, այդ թվում՝ մոտ 25 հազար կանադացիների, որոնք կարող են մնալ արտասահմանում, գրում է CNN-ը։

Կանադայի խոշորագույն ավիաընկերությունը շուրջ ութ ամիս բանակցում էր բորտուղեկցորդների միության հետ, սակայն կողմերը չեն կարողացել համաձայնության հասնել հիմնական հարցերի՝ հատկապես աշխատավարձերի և չվճարվող աշխատանքի շուրջ։ Միությունը մերժել է պարտադիր արբիտրաժի տարբերակը՝ պահպանելով գործադուլ իրականացնելու իրավունքը։ Ընկերության վերջին առաջարկը՝ չորս տարվա ընթացքում ընդհանուր փոխհատուցման 38 տոկոս աճ, միությունը համարել է անբավարար՝ նշելով, որ առաջին տարվա 8 տոկոս բարձրացումը չի համապատասխանում գնաճի տեմպերին։

Գործադուլից տուժած ուղևորները կարող են դիմել Air Canada-ի կայքում կամ հավելվածում՝ ամբողջական փոխհատուցման համար։ Ընկերությունը փորձում է ուղևորներին տեղափոխել այլ ավիաընկերություններով, սակայն նախազգուշացնում է, որ ամառային բարձր բեռնվածության պատճառով արագ վերագրանցումը գրեթե անհնար է։ Ընկերության ղեկավարությունը նաև նշել է, որ նույնիսկ գործարքի դեպքում թռիչքները կարող են վերականգնվել ոչ շուտ, քան մեկ շաբաթ անց։