Ռուսաստանը չի շտապում համագործակցել ԱՄՆ-ի հետ նավաշինության ոլորտում

Ռուսաստանի և ԱՄՆ-ի միջև նավաշինության ոլորտում համագործակցությունը դեռևս քիչ հավանական է, հայտարարում է Պետդումայի արդյունաբերության և առևտրի կոմիտեի փոխնախագահ Ալեքսանդր Սպիրիդոնովը։ Նրա խոսքով՝ բացառություն կարող են դառնալ միայն բնական պաշարների համատեղ շահագործման նախագծերը, որոնց համար անհրաժեշտ կլինի հատուկ նավատորմ։

Ալյասկայում կայացած Պուտին–Թրամփ բանակցություններից հետո քննարկվում էր նաև ռուսական ատոմային սառցահատների ներգրավման հնարավորությունը ամերիկյան էներգետիկ նախագծերում։ Սակայն Սպիրիդոնովը շեշտեց, որ ԱՄՆ-ն ինքնուրույն կարող է զարգացնել իր սառցահատային նավատորմը՝ ունենալով մեծ փորձ տրանսպորտային ռեակտորների ու խոշոր նավաշինական նախագծերի մեջ։

Պատգամավորը հիշեցրեց, որ այսօր միայն Ռուսաստանն ունի գործող ատոմային սառցահատային նավատորմ։ «Բալթյան գործարանում» արդեն շահագործման են հանձնվել «Արկտիկա», «Սիբիր», «Ուրալ» և «Յակուտիա» նավերը, իսկ կառուցման փուլում են «Չուկոտկա», «Լենինգրադ» և հզորագույն «Լիդեր» սառցահատը, որը թույլ կտա գրեթե ամբողջ տարին ապահովել նավագնացություն հյուսիսային ծովային ուղով։