Արտակարգ պատահար ՌԴ Ռյազանի մարզի ձեռնարկությունում. զոհվել է 14 մարդ

Ճշտված տեղեկություններով, Ռուսաստանի Ռյազանի մարզում տեղի ունեցած արտակարգ պատահարի հետևանքով 14 մարդ է զոհվել, հաղորդում է РИА Новости-ն՝ հղում անելով ԱԻՆ մամուլի ծառայությանը։

Ինչպես ավելի վաղ հայտնել էր Ռյազանի մարզի նահանգապետ Պավել Մալկովը, ուրբաթ առավոտյան Շիլովսկի շրջանի ձեռնարկության արտադրամասում հրդեհ է բռնկվել։ Մալկովը նշել էր, որ տուժել է ավելի քան 100 մարդ, հինգը՝ զոհվել։ Ռյազանի մարզի Քննչական կոմիտեի քննչական վարչությունը հայտնել էր ՌԴ ՔՕ 217-րդ հոդվածի 3-րդ մասով (Արտադրական վտանգավոր օբյեկտներում արդյունաբերական անվտանգության պահանջների խախտում, որն անզգուշությամբ հանգեցրել է երկու կամ ավելի անձանց մահվան) նախատեսված հանցագործության հատկանիշներով քրեական գործ հարուցելու մասին։

«Ռյազանի մարզում վթարափրկարարական աշխատանքները շարունակվում են։ Ռուսաստանի ԱԻՆ աշխատակիցները շարունակում են մաքրել Լեսնոյ գյուղում տեղի ունեցած պատահարի հետևանքով առաջացած փլատակները։ Բացի այդ, Ռուսաստանի ԱԻՆ հոգեբաններն անընդհատ աշխատում են դեպքի վայրում... Այս պահի դրությամբ, ճշտված տեղեկություններով, տուժել է 149 մարդ, նրանցից 14-ը զոհվել է»,- ասվում է հաղորդագրության մեջ։

Նշվում է, որ աշխատանքներն իրականացվում են իրավապահ մարմինների և տարածաշրջանի կառավարության ներկայացուցիչների հետ սերտ փոխգործակցությամբ, ինչպես նաև Ռուսաստանի ԱԻՆ մասնագետները մասնակցում են ճանաչման ընթացակարգի ուղեկցմանը, տեղեկատվական թեժ գծի աշխատանքներին, աշխատում են զոհվածների և տուժածների ընտանիքների հետ։

news.am