Երևանի քաղաքապետ Տարոն Մարգարյանը հանդիպել է ՀՀ-ում ԱՄՆ արտակարգ և լիազոր դեսպան Ջոն Հեֆֆերնին

Երևանի քաղաքապետ Տարոն Մարգարյանը հունվարի 20-ին հանդիպել է ՀՀ-ում ԱՄՆ արտակարգ և լիազոր դեսպան Ջոն Հեֆֆերնին։

Շնորհակալություն հայտնելով ընդունելության համար՝ դեսպանը շնորհավորել է Տարոն Մարգարյանին Երևանի քաղաքապետի պատասխանատու պաշտոնում ընտրվելու կապակցությամբ։

Շնորհակալություն հայտնելով շնորհավորանքի և բարեմաղթանքների համար և նշելով, որ հայ-ամերիկյան հարաբերությունները գտնվում են բարձր մակարդակի վրա՝ քաղաքապետ Տարոն Մարգարյանը կարևորել է երկկողմ կապերի զարգացումն ու ընդլայնումը տարբեր ոլորտներում։

Քաղաքապետը դեսպանի խնդրանքով ներկայացրել է մայրաքաղաքի զարգացմանն ուղղված ծրագրերն ու այն հիմնական ուղղությունները, որոնք առաջնային են քաղաքային տնտեսության զարգացման, Երևան առավել բարեկարգ, հարմարավետ ու գրավիչ դարձնելու ուղղությամբ. «Շատ կարևոր է Ձեր և Միացյալ Նահանգներում Հայաստանի Հանրապետության արտակարգ և լիազոր դեսպանի աջակցությունը քաղաքային տնտեսության կառավարման ոլորտում փորձի փոխանակման, մասնագետների վերապատրաստման, փորձագիտական խորհրդատվության և ընդհանրապես բոլոր այն հարցերում, որոնք կնպաստեն մեր քաղաքի զարգացմանը»,- նշել է Տարոն Մարգարյանը։

Դեսպան Հեֆֆերնը իր հերթին պատրաստակամություն է հայտնել օժանդակել Միացյալ Նահանգների տարբեր քաղաքների և Երևանի միջև կապերի սերտացման և կոնկրետ ծրագրերի իրականացման հարցում։