Բոլիվիայի ձախերը կործանարար պարտության են հասել․ նախագահական ընտրությունները կանցնեն երկրորդ փուլ

Բոլիվիայում կայացած ընտրությունների նախնական արդյունքները ցույց են տալիս, որ կենտրոնամետ սենատոր Ռոդրիգո Պասը դուրս է եկել առաջատար՝ ստանալով ավելի քան 32 տոկոս քվե։ Իշխող «Շարժում սոցիալիզմի համար» կուսակցությունը (MAS) պատմական պարտություն է կրել՝ հավաքելով ընդամենը շուրջ 3 տոկոս։ Երկրորդ տեղում է պահպանողական նախկին նախագահ Խորխե «Տուտո» Կիրոգան՝ 26 տոկոսով։

Ըստ Սահմանադրության՝ թեկնածուները կանցնեն երկրորդ փուլ, եթե ոչ ոք չհասնի 40 տոկոսի և չունենա առնվազն 10 տոկոսային առավելություն։ Վերջնական պաշտոնական արդյունքները կհրապարակվեն առաջիկա յոթ օրում, իսկ երկրորդ փուլը նշանակված է հոկտեմբերի 19-ին։ Կենտրոնամետ Պասին արդեն իր աջակցությունն է հայտնել գործարար Սամուել Դորիա Մեդինան, ով պարտվել է առաջին փուլում, հայտնում է Reuters-ը։

Այս ընտրությունները համընկան Բոլիվիայի ծանր տնտեսական ճգնաժամի հետ․ գնաճը հասել է վերջին քառասուն տարվա ամենաբարձր մակարդակին՝ 23 տոկոս։ Քվեարկողները, որոնց մեծ մասը դժգոհ էր իշխող MAS-ից, ընտրեցին փոփոխության օգտին։ Էվո Մորալեսի՝ ընտրությունները բոյկոտելու կոչերը չեն լսվել, և մասնակցությունը բարձր էր։ Վերլուծաբանների կարծիքով՝ երկիրը կանգնած է քաղաքական համակարգի վերափոխման շեմին։