Իսպանիայում անտառային հրդեհները փակեցին Սանտյագոյի ուխտագնացության ճանապարհը

Իսպանիայում շարունակվող խոշոր անտառային հրդեհները հասել են Պիկոս դե Էուրոպա լեռների հարավային լանջերին՝ ստիպելով իշխանություններին փակել Սանտյագո դե Կոմպոստելայի հայտնի ուխտագնացության ուղու մի հատված։ Վերջին շաբաթում Գալիսիայում և Կաստիլյա և Լեոնում այրվել է ավելի քան 115 հազար հեկտար տարածք։

Իսպանիայի պաշտպանության նախարար Մարգարիտա Ռոբլեսը հայտարարել է, որ նման հրդեհային իրավիճակ երկիրը չի ունեցել արդեն երկու տասնամյակ։ Նրա խոսքով՝ կլիմայական փոփոխությունների և 16-օրյա շոգի պատճառով կրակները ձեռք են բերել «առանձնահատուկ բնույթ»։ Կառավարությունը հրդեհաշիջման աշխատանքներին ներգրավել է 1900 զինծառայող, սակայն խիտ ծուխը խոչընդոտում է օդային ուժերի աշխատանքին, հայտնում է Reuters-ը։

Աստորգա և Պոնֆերադա քաղաքների միջև գտնվող հատվածում ճանապարհը փակվել է, իսկ ուխտավորներին կոչ են արել չվտանգել կյանքը։ Հրդեհների հետևանքով արդեն զոհվել են չորս հրշեջներ։ Մայիսից ի վեր իշխանությունները ձերբակալել են 27 և քննում են 92 մարդու՝ դիտավորությամբ հրդեհներ առաջացնելու կասկածանքով։ Վերջին օրերին աննախադեպ շոգի պայմաններում նման մասշտաբի հրդեհներ են արձանագրվում նաև Պորտուգալիայում։