Հնդկաստանը կտրուկ նվազեցնում է փոքր ավտոմեքենաների և ապահովագրության հարկերը

Հնդկաստանի վարչապետ Նարենդրա Մոդիի կառավարությունը ներկայացրել է ամենամեծ հարկային բարեփոխումը 2017-ից ի վեր․ նախատեսվում է կտրուկ իջեցնել ապրանքների և ծառայությունների հարկը (GST) փոքր ավտոմեքենաների և ապահովագրական պոլիսների վրա։ Նախնական առաջարկի համաձայն՝ բենզինային ու դիզելային փոքր մեքենաների հարկը կնվազի ներկայիս 28%-ից մինչև 18%, իսկ կյանքի և առողջության ապահովագրության համար՝ մինչև 5% կամ նույնիսկ զրո։

Գործակալության տվյալներով՝ հայտարարությունը խթանել է Հնդկաստանի բորսան․ «Maruti Suzuki»-ի բաժնետոմսերը թռել են գրեթե 9%-ով, իսկ «Mahindra & Mahindra», «Hero MotoCorp» և «Bajaj Auto» ընկերությունների բաժնետոմսերը բարձրացել են 2-4%-ով։ Ապահովագրական ընկերությունների՝ «ICICI Prudential», «SBI Life» և «LIC» բաժնետոմսերը նույնպես աճել են մինչև 5%-ով, հայտնում է Reuters-ը։

Բարեփոխումները, որոնք նախատեսվում է ուժի մեջ մտնել հոկտեմբերից, կներկայացվեն Հարկային խորհրդին հաստատման համար։ Թեև նոր կառուցվածքը կարող է նվազեցնել պետական եկամուտները, այն արդեն արժանացել է բիզնեսի և վերլուծաբանների գովեստին՝ որպես քայլ, որը բարձրացնելու է Հնդկաստանի մրցունակությունն ու կօգնի Մոդիին ամրապնդել իր դիրքերը միջազգային առևտրային հակամարտությունների պայմաններում։