Չինաստանը պատրաստվում է ներկայացնել Տ-14 «Արմատայի» մրցակից տանկը

Չինաստանը պատրաստվում է ներկայացնել ռուսական Տ-14 «Արմատայի» մրցակից նոր տանկ և նույն շասսիի վրա ստեղծված հետևակի մարտական մեքենա։ Այս մասին գրել է Military Watch Magazine-ը։

Ըստ պարբերականի՝ պաշտոնական ներկայացումը կարող է կայանալ սեպտեմբերի 3-ին Պեկինում անցկացվող ռազմական շքերթի ժամանակ։ Նշվում է, որ տանկը առանձնանում է ուժեղացված դինամիկ պաշտպանությամբ ամբողջ կորպուսի և աշտարակի վրա։ Մարտական մոդուլը կառավարվում է հեռակառավարմամբ և համալրված է GL6 նոր համակարգով, որը ռադարների միջոցով մշտապես հետևում է տարածքին և ավտոմատ արձակում պաշտպանական միջոցներ՝ խոցող սպառնալիքները չեզոքացնելու համար։

MWM-ը նշում է, որ Չինաստանը վերջին տասնամյակներում զգալի առաջընթաց է գրանցել՝ բանակի սպառազինությունը համալրելով չորս նոր տանկերով։ Թեև Ռուսաստանը առաջինը ներկայացրեց նոր սերնդի Տ-14 «Արմատան», այն մինչ այժմ լայնորեն չի ներդրվել զորքերում։