Պուտինի, Թրամփի և Զելենսկու հանդիպումը կարող է կայանալ Ստամբուլում

Ռուսաստանի նախագահ Վլադիմիր Պուտինի, ԱՄՆ նախագահի Դոնալդ Թրամփի և Ուկրաինայի առաջնորդ Վլադիմիր Զելենսկու հնարավոր հանդիպումը կարող է անցկացվել Ստամբուլում։ Այդ մասին գրում է թուրքական Milliyet պարբերականը։

Նշվում է, որ բանակցությունները հնարավոր է կազմակերպել Աթաթուրքի անվան օդանավակայանում, որտեղ առկա են անհրաժեշտ ենթակառուցվածքները՝ պատվավոր հյուրերի սրահը և մամուլի ասուլիսների համար նախատեսված դահլիճները։ Բացի այդ, օդանավակայանի տարածքում հնարավոր է արագ տեղակայել հակաօդային պաշտպանության համակարգեր։

Հրապարակման մեջ ընդգծվում է, որ Թուրքիան միակ երկիրն է, որը կարճ ժամանակում կարող է կազմակերպել նման քաղաքական գագաթնաժողով։ Ավելի վաղ Sky News-ը տեղեկացրել էր, որ հանդիպման հնարավոր վայրերի թվում դիտարկվում են նաև Հռոմն ու Ժնևը։