Երբ տեղի կունենա Պուտինի և Զելենսկու հանդիպումը․ Մերցը մանրամասներ է հայտնել

Ռուսաստանի նախագահ Վլադիմիր Պուտինի և Ուկրաինայի առաջնորդ Վլադիմիր Զելենսկու միջև հանդիպումը կարող է տեղի ունենալ առաջիկա երկու շաբաթվա ընթացքում։ Այս մասին հայտարարել է Գերմանիայի կանցլեր Ֆրիդրիխ Մերցը, հաղորդում է Reuters-ը։

«ԱՄՆ  նախագահը հեռախոսազրույց է ունեցել Ռուսաստանի նախագահի հետ և համաձայնության եկել, որ  առաջիկա երկու շաբաթվա ընթացքում տեղի կունենա հանդիպում՝ ՌԴ նախագահի և Ուկրաինայի նախագահի միջև», - ասել է նա։

Օգոստոսի 18-ին Սպիտակ տանը տեղի է ունեցել ԱՄՆ նախագահ Դոնալդ Թրամփի և Ուկրաինայի նախագահ Զելենսկու միջև հանդիպումը։ Նրանցից բացի, բանակցություններին մասնակցել են նաև մի շարք եվրոպական առաջնորդներ, ինչպես նաև Եվրահանձնաժողովի նախագահ Ուրսուլա ֆոն դեր Լեյենը և ՆԱՏՕ-ի գլխավոր քարտուղար Մարկ Ռյուտեն։

Թրամփը բանակցություններ է վարել Ռուսաստանի նախագահ Վլադիմիր Պուտինի հետ՝ Սպիտակ տան ղեկավարի և Եվրոպայի առաջնորդների հետ հանդիպումից հետո։ Ռուսաստանի նախագահի օգնական Յուրի Ուշակովը հայտարարել է, որ Պուտինը և Թրամփը կողմ են Ռուսաստանի ու Ուկրաինայի պատվիրակությունների միջև ուղիղ բանակցությունների անցկացմանը։

ԱՄՆ նախագահը հայտարարել է, որ արդեն սկսել է նախապատրաստվել Պուտինի և Զելենսկու հետ հանդիպմանը: Թրամփի խոսքով՝ Ռուսաստանի և Ուկրաինայի առաջնորդների հետ իր հանդիպումը կկայանա նրանց երկկողմանի բանակցություններից հետո: Axios պորտալը պնդում է, որ Թրամփը հույս ունի Պուտինի և Զելենսկու միջև հանդիպում անցկացնել մինչև օգոստոսի վերջը: