Մակրոնը հայտարարեց․ եվրոպացիները փոխել են Թրամփի դիրքորոշումը Ուկրաինայի հարցում

Ֆրանսիայի նախագահ Էմանուել Մակրոնը հայտարարել է, որ եվրոպական առաջնորդներին հաջողվել է փոխել ԱՄՆ նախագահ Դոնալդ Թրամփի մոտեցումը Ուկրաինայի հակամարտության կարգավորման հարցում։ «Ես իսկապես կարծում եմ, որ հունվարից, երբ նա վերադարձավ Սպիտակ տուն, մենք կարողացանք փոխել նրան։ Հիշեք, թե ինչպես էր նա խոսում մեկ օրում պատերազմը ավարտելու մասին, հիշեք նաև նվաստացուցիչ տեսարանը Օվալաձև սենյակում Զելենսկու հետ», — ասել է Մակրոնը Paris Match-ին տված հարցազրույցում։

Մակրոնի խոսքով՝ Թրամփի դիրքորոշման հիմնական փոփոխությունն այն է, որ նա այժմ գիտակցում է՝ Ուկրաինային անհրաժեշտ են անվտանգության երաշխիքներ։ Ֆրանսիայի նախագահի կարծիքով՝ դա հնարավոր դարձավ առաջին հերթին եվրոպական երկրների միասնականության շնորհիվ։

Ավելի վաղ Սպիտակ տանը կայացել էր Թրամփի, Զելենսկու և եվրոպական մի շարք առաջնորդների հանդիպումը։ Քննարկումներին մասնակցել են Եվրահանձնաժողովի նախագահ Ուրսուլա ֆոն դեր Լայենը, Գերմանիայի կանցլեր Ֆրիդրիխ Մերցը, Մեծ Բրիտանիայի վարչապետ Քիր Ստարմերը, Ֆրանսիայի նախագահ Մակրոնը, Իտալիայի վարչապետ Ջորջա Մելոնին, Ֆինլանդիայի նախագահ Ալեքսանդր Ստուբբը և ՆԱՏՕ-ի գլխավոր քարտուղար Մարկ Ռյուտտեն։