Խաղաղության նոր կարգավիճակ Հայաստանում․ Փաշինյանի ուղերձը և քաղաքական արձագանքները

Խաղաղության նոր կարգավիճակ Հայաստանում՝ Փաշինյանի ուղերձը և քաղաքական արձագանքները

Իրանի նախագահ Մասուդ Փեզեշքիանի երկօրյա այցից առաջ ՀՀ վարչապետ Նիկոլ Փաշինյանը երեկ իր կարևոր տեսաուղերձով դիմեց հասարակությանը՝ անդրադառնալով Հայաստանի համար առանցքային մի քանի հարցերի։

Փաշինյանը նշեց, որ օգոստոսի 8-ից հետո Հայաստանի և Ադրբեջանի միջև հաստատված է խաղաղություն՝ ԱՄՆ նախագահ Դոնալդ Թրամփի աջակցությամբ։

Նրա խոսքով՝ այժմ Հայաստանը մտնում է նոր փուլ, երբ պետք է սովորի ապրել ոչ թե պատերազմի, այլ խաղաղության պայմաններում։

Նա ընդգծեց, որ կողմերը ճանաչել են միմյանց սահմանների անխախտելիությունը 1991 թ․ Ալմա-Աթայի հռչակագրի հիման վրա։

Փաշինյանի խոսքով՝ Հայաստանի ու Ադրբեջանի միջև սահմանազատման գործընթացում պետք է լուծվի նաև այն հարցը, որ ՀՀ ինքնիշխան տարածքի որոշ հատվածներ գտնվում են ադրբեջանական վերահսկողության ներքո, և փոխադարձաբար կան ադրբեջանական տարածքներ, որոնք գտնվում են հայկական վերահսկողության ներքո։

Գերիների հարցի վերաբերյալ վարչապետը ասաց, որ իրենք լուրջ ջանքեր են գործադրել այն ներառելու խաղաղության համաձայնագրում, բայց վերջնական որոշում կայացվել է չներառել, քանի որ դա կարող էր հետաձգել նրանց վերադարձը։

Անդրադառնալով արցախցիների ճակատագրին՝ Փաշինյանը նշել է, որ «առանց Ղարաբաղի հարցը փակելու՝ խաղաղությունն անհնար է»։

Նրա խոսքով՝ տեղահանված արցախցիների վերադարձը իրատեսական չէ, և նրանք պետք է հաստատվեն Հայաստանում։

Փաշինյանը խաղաղությունը համեմատեց նորածնի կամ նորակառույց տան հետ՝ շեշտելով, որ այն ամենօրյա խնամք ու հոգատարություն է պահանջում։

Փաշինյանի ուղերձին հետևել են մի շարք արձագանքներ քաղաքական գործիչների կողմից, որոնք քննադատել են նրա հայտարարությունները։

Քաղաքական մեկնաբան Մենուա Սողոմոնյանը Փաշինյանի խոսքերը համարել է «լկտիության գագաթնակետ»՝ նշելով, որ նա, իշխանության գալով «Արցախի դեօկուպացիայի» խոստումներով, այժմ հրաժարվում է տեղահանված արցախցիների հարցը բարձրացնելուց։

«Մայր Հայաստան» խմբակցության ղեկավար Անդրանիկ Թևանյանը Փաշինյանին անվանել է «մասնագիտությամբ ստախոս»՝ պնդելով, որ նա պարտությունը ներկայացնում է որպես հաղթանակ, իսկ միակողմանի զիջումները՝ որպես «բաղձալի երազանք»։

ՀՀ առաջին նախագահ Լևոն Տեր-Պետրոսյանն իր հերթին մեղադրել է Փաշինյանին Հայաստանի ներքաղաքական կյանքը ապակայունացնելու մեջ՝ քննադատելով նրա կոպիտ պատասխանները տեղահանվածների արդարացի պահանջներին և հիշեցնելով, որ նա մերժել է հատուկ մարմին ստեղծելու առաջարկը, որը կզբաղվեր նրանց խնդիրներով։

Ըստ Տեր-Պետրոսյանի՝ արցախցիների խնդիրները վարչապետը փորձում է քողարկել ագրեսիվ հռետորաբանությամբ՝ փոխանակ դրանք լուծի արդյունավետ կառույցի ստեղծմամբ։

Մանե Գևորգյան