Ռուսաստանում քննադատեցին Զելենսկու պահանջը՝ ՌԴ-ից փոխհատուցում ստանալու մասին

Ռուսաստանի Դաշնության խորհրդի միջազգային գործերի կոմիտեի առաջին փոխնախագահ Վլադիմիր Ջաբարովը արձագանքել է Ուկրաինայի նախագահ Վլադիմիր Զելենսկու հայտարարությանը՝ նշելով, որ «Կիևը միշտ էլ աչք է ունեցել ուրիշի ունեցվածքին, քանի որ սովոր է գողանալ»։ Նա այսպես մեկնաբանել է Զելենսկու պահանջը, որ Ռուսաստանը փոխհատուցի Ուկրաինային՝ օգտագործելով Արևմուտքում սառեցված ռուսական ակտիվները։

Ավելի վաղ Financial Times-ը հայտնել էր, որ Կիևը պատրաստում է փաստաթուղթ՝ Ռուսաստանի նկատմամբ փոխհատուցման պահանջի վերաբերյալ։ Ըստ դրա, Ուկրաինան ակնկալում է շուրջ 300 միլիարդ դոլարի հատուցում, որը նախատեսվում է ստանալ Արևմուտքում սառեցված ռուսական պետական ակտիվներից։

Ջաբարովը հակադարձել է, որ եթե խոսք է գնում փոխհատուցման մասին, ապա նախ պետք է Կիևը պատասխան տա Դոնբասում և Լուգանսկում իրականացված ավերածությունների ու մարդկանց կրած տառապանքների համար։ Նրա խոսքով՝ Ուկրաինային ավելի լավ է այս թեման ընդհանրապես չբարձրացնել։