SoftBank-ը 2 միլիարդ դոլարի ներդրում է անում Intel-ում

Ճապոնական տեխնոլոգիական հսկա SoftBank-ը 2 միլիարդ դոլարի կապիտալ ներդրում է կատարում ամերիկյան Intel-ում՝ դժվար իրավիճակում գտնվող չիպ արտադրողին ֆինանսական աջակցություն ցուցաբերելու համար։ Գործարքը SoftBank-ին դարձնում է Intel-ի վեցերորդ ամենամեծ բաժնետերը՝ ընկերության մոտ 2% բաժնեմասով։

Ներդրումն իրականացվում է այն պահին, երբ Intel-ը փորձում է դուրս գալ տարիների կառավարման սխալներից և վերադառնալ մրցակցային դաշտ՝ հատկապես արհեստական ինտելեկտի չիպերի շուկայում, որտեղ գրեթե դիրք չունի։ Չնայած ֆինանսական աջակցությանը՝ վերլուծաբանները նշում են, որ սա չի լուծի ընկերության հիմնական խնդիրները։ Intel-ը 2024-ին գրանցել էր 18,8 միլիարդ դոլարի տարեկան վնաս՝ առաջին անգամ 1986-ից ի վեր։

SoftBank-ը ներդրումը կատարում է առանց Intel-ի խորհրդում տեղ զբաղեցնելու կամ ընկերության չիպերը գնելու պարտավորության։ Ներդրումն արվում է մեկ բաժնետոմսի դիմաց 23 դոլարով՝ փոքր զեղչով շուկայի գնի համեմատ։ Գործարքից հետո Intel-ի բաժնետոմսերը աճել են մոտ 7%-ով նախավաճառքում, մինչդեռ SoftBank-ի արժեթղթերը Ճապոնիայում փակվել են 4%-ով անկումով, փոխանցում է Reuters-ը։